"Sumqayıt”dan ayrılan Vurğun Hüseynov qarşıdakı mövsümdə "Kəpəz”in formasını geyəcək.
Xeberle.com xəbər verir ki, "kimyaçılar”ın rəhbərliyi müdafiəçiyə klubda qalıb məşqçi kimi çalışmağı təklif etmişdi. Ancaq görünür, 35 yaşlı o, karyerasını bitirməyi, butslarını mismardan asmağı düşünmür. "Sarı-göylər”lə anlaşan futbolçu "Futbol+”ə açıqlamasında ən azı daha bir il oynamaq istəyinin olduğunu, bu səbəbdən karyerasını davam etdirməyə qərar verdiyini söylədi:
"Ötən dəfə sizinlə söhbətdə "Sumqayıt”ın mənə məşqçilik təklif etdiyini bildirmişdim. Ancaq onu da qeyd etmişdim ki, hansısa baş məşqçi xidmətimdə maraqlı olsa, karyeramı davam etdirə bilərəm. "Kəpəz”in yeni baş məşqçisi Azər Məmmədovdan təklif gəlincə, razılaşdım. Açığı, başqa klublardan təklifim yox idi. Çalışacam təcrübəli futbolçu kimi həm paltardəyişmə otağında, həm də meydanda baş məşqçinin etimadını doğruldum, yeni komandamın uğur qazanmasında pay sahibi olum”.
Təcrübəli müdafiəçi "demək olar, hamı yeni mövsümdə "Kəpəz”in aşkar autsayder olacağını düşünür. Təklifi qəbul edərkən bu məqamı nəzərə aldın” sualına belə cavab verdi:"Mən artıq belə nüanslara öyrəşmişəm. 10 il əvvəl "Sumqayıt”la anlaşanda da komanda, demək olar, sıfırdan qurulurdu. Ancaq illər ötdükcə yeni mərhələyə yüksəldik, müəyyən uğurlara imza atdıq. İki dəfə ölkə kubokunun finalına yüksəldik, avrokuboklara qatıldıq, bürünc medal qazandıq. O vaxt "Sumqayıt”ı da mənim ətrafımda qurdular. Ümid edirəm ki, bu gün çoxlarının autsayder kimi gördüyü "Kəpəz” ildən-ilə inkişaf edəcək, daha yüksək yerlər uğrunda mübarizə aparacaq. Gəncə futbol şəhəridi, burda futbola maraq böyükdü. İnanıram ki, yaxın vaxtlarda "Kəpəz” də ən azı avrokuboklara vəsiqə qazanmaqla gəncəliləri sevindirəcək”.
Xəbərdən istifadə edərkən istinad etmək vacibdir.
