Vüqar Həşimovun xatirəsinə həsr edilmiş şahmat turnirinin keçiriləcəyi məkan bəlli olub.
Xeberle.com xəbər verir ki, sayca 10-cu dəfə baş tutacaq yarış 25-30 sentyabr tarixlərində ilk dəfə ölkəmizin mədəniyyət paytaxtı Şuşada keçiriləcək.
Bu barədə turnirin direktoru Anar Allahverdiyev məlumat verib. O, həmçinin yubiley memorialında olacaq iştirakçıların adını açıqlayıb. Rapid və blits üzrə keçiriləcək görkəmli şahmatçı Vüqar Həşimovun xatirə turnirində Azərbaycanı üç şahmatçı təmsil edəcək. Bunlar milli komandanın üzvləri – Şəhriyar Məmmədyarov, Rauf Məmmədov və Aydın Süleymanlı olacaq. Eyni zamanda turnirdə Nodirbek Abdussatorov (Özbəkistan, FIDE reytinqi 2766), şahmat tacı uğrunda görüşdə iştirak edən Yan Nepomnyaşiy (FIDE, 2755), Riçard Rapport (Macarıstan, 2766), Yan Kşiştof Duda (Polşa, 2732), yarışın son qalibi Vidit Santoş Gujrathi (Hindistan, 2720) kimi tanınmış şahmatçılar mübarizə aparacaq.
Ümumilikdə yarışda 10 şahmatçının iştirakı planlaşdırılır. Son iştirakçıların adı yaxın günlərdə dəqiqləşəcək və mətbuata bu barədə məlumat veriləcək.
Memorialın açılış mərasimi və ilk turun partiyaları sentyabrın 26-da olacaq. Turnir "Şuşa” otelində təşkil olunacaq.
Qeyd edək ki, 10-cu dəfə keçiriləcək Vüqar Həşimov Memorialının baş hakimi müstəqil Azərbaycanın ilk çempionatının qalibi Rauf Hacılıdır.
Xəbərdən istifadə edərkən istinad etmək vacibdir.
