Son illər ölkəmizin bu sahədəki inkişaf tempini, eləcə də elm və təhsilə yönəlik marağın stimullaşdırılmasının təmini baxımından atılan addımların miqyasını müəyyənləşdirmək üçün Sumqayıt nümunəsinə nəzər salmaq kifayətdir. Təhsil müəssisələrinin fəaliyyətinin idarə olunmasında davamlı inkişafın təmin edilməsi xüsusilə müsbət nəticələr verir, göstəricilərin ilbəil yaxşılaşmasına səbəb olur. Sumqayıt məktəbliləri müxtəlif olimpiada və müsabiqələrdə də aktiv iştirak etməkdə, yüksək nəticələr göstərməkdədir.
Sumqayıtın xüsusi bilik və bacarıqlara, istedada, olimpiada nailiyyətlərinə görə fərqlənən şagirdlərindən biri də Məhəmməd Abbaslıdır.
Xeberle.com-un əməkdaşı 10 yaşlı Məhəmməd Abbaslı ilə həmsöhbət olub:
- Məhəmməd, səni yaxından tanıyaq...
- 10 yaşım var. Hazırda Sumqayıt şəhər "İdrak”liseyində təhsil alıram. 4-cü sinifdə oxuyuram.
- Hansı müsabiqələrdə qalib olmusan?
- İndiyədək bir çox yerli və beynəlxalq olimpiadalarda iştirak etmişəm, 7 qızıl (bunlardan 3-ü beynəlxalq medallardır), 7 gümüş və 7 bürünc olmaqla, ümumilikdə 21 medal və bir çox sertifikat, diplomlarım var. Bu il bir çox yerli olimpiadalarla yanaşı beynəlxalq olimpiadalarda iştirak etmişəm. Yanvar ayında Vyetnamda keçirilən "FMO” riyaziyyat olimpiadası, may ayında Türkiyədə keçirilən "TİMO” riyaziyyat olimpiadası və iyun ayında Dubayda keçirilən "FİSO” riyaziyyat olimpiadasında qızıl medal qazanaraq bayrağımızı ucaltmışam.
- Olimpiadalarda iştirak etmək şagirdlərə əlavə hansı üstünlükləri qazandırır?
- Olimpiadalarda iştirak etmək ilk öncə şagirdlərə özgüvən verir, sonra isə dünyaya açılırsan. Bir çox yerləri gəzirsən, yeniliklər öyrənirsən və dostluqlar qazanırsan.
- Hansı fənnə marağın daha çoxdur?
- Daha çox riyaziyyat və ingilis dilinə marağım çoxdur.
- Gələcəyə dair planların nədir?
- Gələcəkdə təhsilimi "Oxford”da davam etdirmək, sonra isə yeni bir şeylər kəşf etməvə, Nobel mükafatı almaq istəyirəm.
- Asudə vaxtını necə dəyərləndirirsən?
- Futbol oynayıram. Həm canlı, həmdə virtual...İngilis dilində müxtəlif qısametrajlı filmlərə baxıram.
- Sumqayıtda təhsil həyatını necə qiymətləndirirsən?
- Sumqayıtda təhsilin daha yaxşı olmasını istərdim. Çünki sumqayıtlı uşaqlar daha çalışqan, daha savadlıdırlar.
- Sumqayıt təhsili sənə nə qazandırıb?
- Bilik, savad və təhsilə həvəs. Eyni zamanda, xarici və yerli olimpiadalara çıxış...
- Şəhərimizdə hansı yeniliklərin tətbiq edilməsini istəyərdin?
Robotexnika, texnofest kimi dərnək və festivalların, eyni zamanda savadlı məktəblilərin bir-biriləri ilə bilik və fikir mübadilələrinin aparılması üçün tədbirlərin şəhərimizdə təşkil edilməsini istərdim.
- Bizə vaxt ayırdığın üçün təşəkkür edirəm.
- Sağ olun.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
