Topaz Premyer Liqasında çempionun kimliyinə aydınlıq gəlsə də, əvəzedici komandaların yarışında bu ad hələ də öz sahibi tapmayıb. Nə qədər maraqlı görünsə də, bu ada hazırda 2 namizəd var. Bunlar  "qardaşlar” adlanan "İnter” və "Simurq”du. O komandalar ki, gələcəkləri hələ də sual altındadı. Sona 2 tur qalmış lider girən zaqatalalılar 35-ci turda AZAL səfərindən bərabərliklə ayrılaraq mövqeyini "bankirlər”ə təhvil verməli olub. 

Əldə etdiyimiz məlumata görə, "təyyarəçilər”lə qarşılaşmada maraqlı hadisə yaşanıb. Belə ki, qarşılaşmanın 90-cı dəqiqəsində paytaxt təmsilçisinin hücumçusu Aydın Qasımov rəqib qapıçı ilə təkbətək çıxsa da, onun qarşısını zaqatalalıların baş məşqçisi Rövşən Babayev kəsib. Təbii ki, oyunu idarə edən hakim Teymur Fərhadov çalışdırıcını texniki zonadan uzaqlaşdırıb. Baş vermiş bu qəribə hadisə ilə Rövşən bəyin fikirlərini öyrəndik. Məşqçi bu addımı istəmədən atdığını və rəqib hücumunun qarşısını almaq niyyətində olmadığını bidirdi:

"Matçda 90-cı dəqiqə idi. Hakim Teymur Fərhadov verdiyi qərarlarla bizi lap "boğaza yığmışdı". İnanın ki, mən çox təmkinli insanam. İşlədiyim 3 il ərzində heç bir problem olmayıb. Heç vaxt referilərə qarşı da kobudluq etməmişik. Komandamızın vəziyyəti göz qabağındadı. Stressli, pulsuz, ac gəlmişik ki, futbol oynayaq. Təhqir etmək istəmirəm amma bu Teymur Fərhadov matçlarmıza təyinat alanda bizə qarşı qərəzi var, ya biliyi bu qədərdi. Oyunlarmızı düzgün idarə etmir. Bu adam o qədər səviyyəsizlik etdi ki, mən axırda meydançaya girdim. Vəziyyət belə oldu ki, rəqib qapıya cərimə zərbəsi olmalı idi. Ancaq hakim oyunu davam etdirdi və epziodun davamında top bizim oyunçumuz Kamrana gəldi. Mən bu vaxt artıq meydançaya girdim. Elə bu vaxt top bizim futbolçunun ayağının altından keçdi və rəqib futbolçu Aydın Qasımova düşdü. O isə qapıya tərəf dönəndə mənimlə üzbəüz qaldı. O, topla irəliləyəndə mən meydana girməmişəm. Yəni top ona çatanda mən artıq meydanda idim. Belə alındı ki, guya mən topun qabağını kəsirəm. Mən futbola yeni gəlməmişəm qaydaları bilirəm. Sadəcə, həmin epziodda əsəbləşmişdim və gedib, hakimi başa salmaq istəyirdim. Meydana girəndə də söyüş söyməmişəm. Təsadüfi alındı. Onsuz da, 1:1 oldu ya, 2:1 uduzduq bunun bizim üçün heç bir əhməiyyəti yoxdu. Yəni, biz artıq itirdiyimizi itirdik. Bu Teymur bizi o qədər bezdirib ki, söz deyə bilmirəm. Maraqlanmaq lazımdı ki, bu adam neçə vaxtdı matçlara təyinat almırdı. Amma indi götürüb, bizim oyuna saldılar. Bu da həlledici qarşılaşma idi. Bəlkə, biz udub çempion olacaqdıq? Bəlkə, bölgədə futbolu saxlayacaqdıq? Bəlkə, bu, insanlarda bir stimul yarada bilərdi? Həmin gün bizə 5 sarı, 1 qırmızı vərəqə verib. Onsuz da, növbəti oyuna çıxartmağa futbolçum yoxdu. Özünüz də bilirsiniz ki, futbolçularımız bu gün əvəzedici, növbəti gün isə əsas komanda ilə meydana çıxırlar. Çatdıra bilmirik. Pulumuz da yoxdu gedib-gəlməyə. Bu qədər çətinliyin qarşısında hakim hamımızın əziyyətini yerə vurdu. Baxın, görün indi bizim kimi, normal futbol oynayan ikinci bir komanda varmı? U-19 komandamız öz çempionatında 2-ci yerə çıxdı. Biz də çempionluq üçün mübarizə aparırıq”. 

Bundan əlavə Rövşən bəy növbəti turda Lənkərana gedib-getməyəcklərinin də hələ aydınlşmadığını bildirib: "Qarşıdan "Xəzər Lənkəran”la matçımız var. Necə olacaq, özüm də bilmirəm. Hazırda Zaqataladayam. Bizə deyildi ki, imkanınız varsa, özünüz gedin. Əgər pul tapa bilsək, gedəcəyik. Olmasa da, Allah canlarını sağ etsin. Bu gün axşam vəziyyətə aydınlıq gələcək. Bu dəqiqə müdriyyətdə heç kim yoxdu ki, əlaqə saxlayaq. Sadəcə öz təşəbbüsümüzdü. Bəlkə, çempion olduq. Çempionluğu da ona görə istəyirik ki, bu qədər əziyyət çəkmişik, ölkədə ən yaxşı futbol oynayan komandayıq. Heyif ki, uşaqlar sonda bu vəziyyətə düşdülər. Bilmirik, indi oyuna gedəcəyik ya yox”.  (futbolinfo.az)