Misli Premyer Liqasının XIX turunun "Kəpəz” - "Turan Tovuz” qarşılaşması Gəncə klubunun 5:2 hesablı qələbəsi ilə başa çatıb.
Xeberle.com Peşəkar Futbol Liqasının rəsmi saytına istinadən xəbər verir ki, qonaq komanda tarixində ilk dəfə Premyer Liqa matçında 4-dən çox top buraxıb.
"Kəpəz” 11 il 8 aydan sonra bir matçda 5 və ya daha çox qol vurub. Gəncəlilər sonuncu dəfə 2013-cü il mayın 13-də "Turan”la səfərdəki qarşılaşmada belə məhsuldar olub – 5:3.
"Kəpəz”in ev matçında 5 və ya daha çox qol vurması isə sonuncu dəfə təxminən 19 il – yəni 18 il 8 ay öncə qeydə alınıb. Gəncə təmsilçisi 2006-cı il mayın 29-da MOİK-i 5:3 hesabı ilə məğlub edib.
Qeyd edək ki, 7 qolun vurulduğu görüş həm də mövsümün ən məhsuldar qarşılaşması adına şərik olub. Oktyabrın 4-də "Kəpəz” – "Neftçi” matçında da eyni sayda qol vurulub – 4:3.
"Kəpəz” - "Turan Tovuz” qarşılaşması tovuzluların futbolçusu Xəyal Nəcəfov üçün də əlamətdar olub. Belə ki, o, Azərbaycan çempionatlarında 200-cü oyununu keçirib. 27 yaşlı yarımmüdafiəçi "Kəpəz”lə səfər matçının gedişində meydana çıxıb. Debütü 2014/2015-ci illər mövsümündə gerçəkləşən Xəyal 200 oyunda 6 qol vurub. O, üç klubda forma geyinib. Nəcəfov "Sumqayıt”da 105 (2 qol), "Neftçi”də 17, "Turan Tovuz”da 78 (4 qol) dəfə şans qazanıb.
Xəbərdən istifadə edərkən istinad etmək vacibdir.
