Misli Premyer Liqasının XXIII turunun "Sumqayıt”la səfər oyunu "Zirə” üçün 2 yubileylə əlamətdar olub.
Xeberle.com Peşəkar Futbol Liqasının rəsmi saytına istinadən xəbər verir ki, paytaxt təmsilçisi bu görüşdə 50-ci səfər qələbəsini qazanıb. Rəşad Sadıqovun komandası 3:0 hesabı ilə qalib gəlib.
Bu, 2015-ci ildə Premyer Liqada debüt edən Bakı klubunun rəqib meydanlarındakı 145-ci oyunda 50-ci qələbəsi olub. "Qartallar” ölkə çempionatları tarixinə səfərdə 50 və daha çox qələbə qazanan 10-cu komanda kimi düşüb. "Zirə” eyni sayda səfərdə 3 xal qazanan "Şəmkir”ə çatıb.
Gürcüstanlı futbolçu Davit Volkov isə "Zirə”də 100-cü oyununu keçirib. 29 yaşlı forvard bu görüşlərdə 34 qola imza atıb.
2020-2022-ci illər mövsümündə oynadığı "Zirə”yə ötən yay qayıdan Volkov Premyer Liqada 80 (28 qol), ölkə kubokunda 12 (2 qol), avrokuboklarda 8 (4 qol) matç keçirib. O, "qartallar”ın heyətində 2020-ci il fevralın 1-də "Sabah”la görüşdə (2:0) debüt edib.
Xəbərdən istifadə edərkən istinad etmək vacibdir.
