Bu gün 2 dəfə Paralimpiya Oyunları çempionu, 2 dəfə dünya çempionu, 5 dəfə Avropa çempionu olan İlham Zəkiyevin doğum günüdür. İ.Zəkiyev 36 yaşını qeyd edir.

AzVision.az bu münasibətlə idmançı ilə əlaqə saxlayaraq ondan doğum günü təəssüratlarını öyrənib.

- Bu gün 36 yaşınız tamam olur. Ad gününüzlə bağlı sizi ilk kim təbrik etdi? Doğum gününüzü necə qeyd edəcəksiniz?

-İlk təbriki həyat yoldaşımdan aldım. Daha sonra ailə üzvlərim, dostlarım təbrik etdilər. Hazırda təbriklər davam edir. Sözün açığı, ad günü mənim üçün o qədər də əhəmiyyətli deyil. 5-10 yaşım yoxdur ki, təmtəraqlı ad günü keçirim. Bu gün adi günlərdən biridir mənim üçün.

-Doğum gününüzdə sizə hədiyyə verən oldumu?

- Olub. Ancaq mən daha çox hədiyyə verməyi xoşlayıram, nəyin ki, hədiyyə almağı. 

-Adətən deyirlər ki, yaş kişinin var- dövlətidir. Razısnız bu fikirlə?

-İllərin sınağından çıxmış bir sözdür. Ona görə də razılaşıram. 

-Sizi varlı kişi hesab etmək olarmı?

-Hesab edin, problem yoxdur. İnsanın ailəsi yanındadırsa, sevdiyi işlə məşğuldursa, onu xoşbəxt hesab etmək olar. İşimdən də, ailəmdən də, həyatımdan da razıyam. 

-36-dan arxaya boylansaq, hansı yaş dövrü üçün darıxmısınız? 

-Mümmükün olmayan şeylər haqqında heç vaxt düşünmürəm. Çünki bilirəm, bu mümkünsüzdür. Çalışıram reallıqdan danışam. Nə varsa, odur. 

-Ad gününüz indiyədək nə ilə yadda qalıb? 

-19 yaşımı hospitalda qeyd etmişəm. O günü heç vaxt unutmaram. Dostlarım və sinif yoldaşlarım yanıma gəlmişdilər. 

-Doğum gününüzdə özünüzə nə arzu edirsiniz?

-Özümə Allahdan şəfa diləyirəm. Əsas can sağlığıdır. Qalan hər şey düzələr.