AFFA ilə "Xəzər Lənkəran" arasındakı gərginlik pik hədə çatıb. Federasiyanın Lənkəran stadionunda gözü olması haqda çoxdan məlumat vermişdik. Hətta bildirmişdik ki, sözügedən stadionun qazonunun bərbad durumda olduğu vaxtlarda AFFA təklif eləmişdi ki, stadionu verin bizə süni örtük eliyək. Təbii ki, rəhbərlik də bu təklifi birmənalı olaraq rədd etmişdi. Son hadisələrdən sonra federasiya yenidən bu məsələni gündəmə gətirib. 
Rekord.az-a daxil olan məlumata görə, dünən AFFA-dan "Xəzər Lənkəran"ın prezidenti Mais Mənsimova zəng olunub. Bizə ötürülən məlumata görə, ona deyilib ki, klubun borclarının ödənilməsi və "Xəzər Lənkəran"ın yenidən Premyer Liqada saxlanılması, lisenziya verilməsi mümkündür. Lakin bunun üçün klub öz stadionunu AFFA-nın balansına verməlidir.
Yəni komanda yenə öz ev oyunlarını Lənkəran stadionunda keçirəcək, orda məşq edəcək, amma arena federasiyanın balansına keçəcək. 
AFFA-nın bu təklifindən bərk əsəbləşən klub prezidenti təklifi rədd edib və bildirib ki, belə şey heç vaxt mümkün ola bilməz.  
Qeyd edək ki, AFFA "Palmali"yə məxsus olan Masallı stadionunu da ələ keçirmək istəyir.