Slovakiya yığması seçmə mərhələdə o qədər də güclü qrupa düşmədiyindən şərqi avropalıların final mərhələsinə adlaması ciddi sürpriz kimi qiymətləndirilmədi. Düzdür, Belarus, Makedoniya və Lüksemburq kimi yığmaları üstələmək nə qədər asan idisə, Ukrayna və son Avropa çempionu İspaniya ilə mübarizə aparmaq o qədər çətin görünürdü. Ancaq İspaniyadan üç, Ukraynadan isə ümumilikdə dörd xal alan Yan Kozakın komandası sonda 22 xalla ikinci olmağı bacardı.

Slovakiya seçmə komandası orta səviyyəli oyunçulardan təşkil olunan kollektivdir. Slovaklar futbol ehtiyatının kasıb olmasına baxmayaraq, debütdəcə qrup mərhələsini aşmağı planlaşdırır. Millinin baş məşqçisi Yan Kozak 4-2-3-1 sxeminə üstünlük verir. Onun sərəncamında bu düzülüşə uyğun yüksək səviyyəli oyunçular var. Düzdü, belələrinin sayı çox deyil, ancaq bu amil onların sadə, amma dəqiq taktikaya söykənən oyun sərgiləməsinə mane olmur. Komandanın ən tanınmış siması İtaliyanın "Napoli” klubunun üzvü Marek Hamşik hesab olunur. Onunla yanaşı, Martin Şkrtel, Robert Mak, Miroslav Stok və Stanislav Şestak da kollektivin aparıcı oyunçuları arasındadır.

Ən sərrast yığma üzvü kənarda qaldı

Slovakiya yığmasının Avropa çempionatına hansı heyətlə yollanacağı müəyyənləşənə qədər Yan Kozakın hücum xəttində kimlərə şans verəcəyi maraq doğururdu. Buna səbəb çalışdırıcının seçmə oyunlarda hücumçu axtarışında olması idi. Yığmanın baş məşqçisinin yenidən təcrübəli Robert Vittekə güvənəcəyini düşünənlər az deyildi, amma Yan Kozak yığma komandanın ən sərrast hücumçusunu Fransaya aparmamaq qərarı verdi. Hər halda, hələlik yekun siyahının necə olacağından dəqiq bəhs etmək mümkün olmasa da, hər halda, onun geniş heyətdə yer almaması belə düşünməyə əsas verir.

Qapıçılar:Yan Muxa, Matuş Kozaçik, Yan Novata

Müdafiəçilər: Milan Şkrinyar, Peter Pekarik, Martin Şkrtel, Norbert Dyomber, Yan Duritsa, Kornel Salata, Tomaş Quboçan, Lukaş Tesak, Duşan Şvento

Yarımmüdafəçilər: Viktor Peçovski, Matuş Bero, Erik Sabo, Robert Mak, Yuray Kuçka, Patrik Qroşovski, Stanislav Şestak, Yan Qrequş, Ondrey Duda, Marek Hamşik, Vladimir Vays, Miroslav Stok

Hücumçular: Mixail Düriş, Adam Nemets, Adam Zrelyak

Slovakiya əvvəlki Avropa çempionatlarında:

1960 – Çexoslovakiyanın tərkibində

1964 – Çexoslovakiyanın tərkibində

1968 – Çexoslovakiyanın tərkibində

1972 – Çexoslovakiyanın tərkibində

1976 – Çexoslovakiyanın tərkibində

1980 – Çexoslovakiyanın tərkibində

1984 – Çexoslovakiyanın tərkibində

1988 – Çexoslovakiyanın tərkibində

1992 – Çexoslovakiyanın tərkibində

1996 – final mərhələsinə yüksələ bilməyib

2000 – final mərhələsinə yüksələ bilməyib

2004 – final mərhələsinə yüksələ bilməyib

2008 – final mərhələsinə yüksələ bilməyib

2012 – final mərhələsinə yüksələ bilməyib

AÇ iştirakçısı bizə qarşı: DÇ-ya yolu Bakıda kəsilən "Repre”

Slovakiya yığması Azərbaycan seçmə komandası üçün az qala əbədi rəqiblərdən biri sayılır. Məsələ burasındadır ki, "Repre” indiyədək 3 dəfə yığmamızla eyni seçmə qrupa düşüb. Beynəlxalq arenada hər iki yığma üçün debüt tsikli olan Avro-1996-da da (1:4, 0:1), dörd il sonrakı yarışda da (0:3, 0:1) futbolçularımız rəqib qarşısında aciz qalıb. Yeri gəlmişkən, AVRO-2000-nin seçmə mərhələsinin son matçında slovaklara uduzan milli komandamızın çalışdırıcısı Əhməd Ələsgərov vəzifəsindən istefa vermişdi. Slovaklarla son qarşılaşmalarımız isə nisbətən uğurlu olmuşdu. Belə ki, 2002-ci ilin mundialına gedən yolda kifayət qədər uğurlu oynayan və yığmamızı da yenən (1:3) slovakiyalılar həlledici zərbəni Bakıda İqor Ponomaryovun yetirmələrindən almışdı. Tofiq Bəhrəmav adına Respublika stadionunda 2:0 hesabı ilə uduzan qonaqlar sonda DÇ-2002-dən kənarda qalmışdı.

AVRO-2016-da oyunları:

11 iyun. 20:00. Uels – Slovakiya

15 iyun. 17:00. Rusiya – Slovakiya

20 iyun. 23:00. Slovakiya – İngiltərə

Tural Məmmədov