Macarıstan milli komandası Avropa çempionatının ən zəif komandalarından biri hesab olunur. Birvaxtlar qazandığı uğurlarla dünya futbolunda adından söz etdirən və üç dəfə Olimpiya çempionu (1952, 1964, 1968) olan macarlar Ferenk Puşkaş, Sandor Koçsis, Jozef Bozşik, Zoltan Çzibor və Qyula Qrosiçs kimi oyunçulardan ibarət heyəti ilə əfsanəyə çevirilmişdi. Sonradan eniş dövrünü yaşayan "Qızıl komanda” son 44 ildə heç bir Avropa birinciliyinin iştirakçısı olmamışdı.

Seçmə mərhələ necə keçdi?

Avropa çempionatında ən böyük uğuru 1964-cü ildə qazanılan bürünc mükafat olan Macarıstan millisi AVRO-2016-ya vəsiqə əldə etməklə tarixində üçüncü dəfə qitə birinciliyində oynamaq hüququ qazandı. Seçmə mərhələdə o qədər də çətin olmayan qrupda üçüncü olan komanda pley-off mərhələsində Norveç yığmasını üstələməklə hədəfinə çatdı. Seçmə mərhələnin ilk beş oyununda 11 xal toplayan "Macar sehrbazları” baş məşqçi postunda məcburiyyətdən Pal Dardaini Bernd Ştorkla əvəzləsə də, bu proses macarların uğurlu çıxışına mane olmadı. Alman mütəxəssisin qarşısına uğurlu seriyanı davam etdirmək qoyulmuşdu ki, 52 yaşlı çalışdırıcı da bunun öhdəsindən gəlməklə komandanı Avropa çempionatına daşıdı.

Son 17 ildə bir qapıçı ilə

Komandanın AÇ-də qrupdan çıxmaq şansları çox aşağı dəyərləndirilir. Bu isə Macarıstan milli komandasının heyətinin zəif olması ilə bağlıdır. Daha çox yaşlı oyunçularına bel bağlayan kollektivin qapısını hələ də Qabor Kiray qoruyur. Məlumat üçün bildirək ki, qolkiper AVRO-2016-da çıxış edəcək ən yaşlı futbolçudur. Son 17 ildə millinin formasını geyən 40 yaşlı "çərçivə qoruyucusu” ilə yanaşı, 37 yaşlı Zoltan Gera və 33 yaşlı müdafiəçi Roland Yuxaş da komandanın əsas oyunçuları sayılır. Komandanın lideri isə Balaj Cucak sayılır. Türkiyə "Bursaspor”unda top qovan 30 yaşlı yarımmüdafiəçi sürəti və güclü zərbələri ilə seçilir. Onun sol cinahda yer alacağı nə qədər dəqiqsisə, orta sahənin sağında kimin oynayacağı qeyri-müəyyəndir. Yarımmüdafiənin sağında 7 fərqli futbolçu sınayan Bernd Ştorkun kimə güvənəcəyini proqnozlaşdırmaq çətindir.

AÇ-yə hansı "23-lük” gedir?

Əksər oyunçuları yerli və Polşa çempionatında top qovan "sehirbazlar”ın düşərgəsində Almaniya, Türkiyə, Slovakiya və Qətər kimi ölkələrin çempionatında top qovan futbolçular da var. Ümumilikdə AÇ-yə yollanan "23-lük”də legioner həyatı yaşayan 10 oyunçu yer alır.

Qapıçılar: Qabor Kiray ("Holodaş”), Deneş Dibus ("Ferentsvaroş”), Peter Qulaçi ("Leyptsiq”, Almaniya)

Müdafiəçilər: Attila Fiola ("Puşkaş-Akademiya”), Qerqe Lovrençiç, Tamaş Kadar (hər ikisi "Lex”, Polşa), Barnabaş Beşe (MTK), Riçard Quemiç ("Visla”, Polşa), Roland Yuxas, Adam Lanq (hər ikisi "Videoton”), Adam Pinter ("Ferentsvaroş”), Mixay Korxut ("Debretsen”)

Yarımmüdafiəçilər: Akoş Elek ("Dioşdyer”), Zoltan Qera, Adam Nad (hər ikisi "Ferentsvaroş”), Laslo Klyaynhaysler ("Verder”, Almaniya), Balaj Djudjak ("Bursaspor”, Türkiyə), Zoltan Ştiber ("Nürnberq”, Almaniya)

Hücumçular: Adam Salai ("Hannover”, Almaniya), Kristian Nemet ("Əl-Qarafa”, Qətər), Nemanya Nikoliç ("Legia”, Polşa), Tamaş Prişkin ("Slovan”, Slovakiya), Daniel Bede ("Ferentsvaroş”)

Macarıstan əvvəlki Avropa çempionatlarında:

1960 – Final mərhələsinə yüksələ bilməyib

1964 – 3-cü yer

1968 – Final mərhələsinə yüksələ bilməyib

1972 – 4-cü yer

1976 – Final mərhələsinə yüksələ bilməyib

1980 – Final mərhələsinə yüksələ bilməyib

1984 – Final mərhələsinə yüksələ bilməyib

1988 – Final mərhələsinə yüksələ bilməyib

1992 – Final mərhələsinə yüksələ bilməyib

1996 – Final mərhələsinə yüksələ bilməyib

2000 – Final mərhələsinə yüksələ bilməyib

2004 – Final mərhələsinə yüksələ bilməyib

2008 – Final mərhələsinə yüksələ bilməyib

2012 – Final mərhələsinə yüksələ bilməyib

AÇ iştirakçısı bizə qarşı: Kazbek Tuayevi yola salanlar

Macarıstan milli komandası Azərbaycan yığması ilə indiyədək dörd dəfə qarşılaşıb və bütün oyunlarda komandamızdan üstün olub. İlk dəfə 1998-ci ildəki dünya çempionatının final mərhələsində qarşılaşan tərəflərin ilk matçı Bakıda baş tutmuş və qonaqlar 3:0 hesabı ilə qalib gəlmişdi. Yeri gəlmişkən, xatırladaq ki, bu qarşılaşmadan sonra komandamızın baş məşqçisi Kazbek Tuayev istefa vermiş və onu Vaqif Sadıqov əvəzləmişdi. Sadıqovun rəhbərlik etdiyi milli komandamızın macarlarla ikinci görüşü isə 3:1 hesabı ilə rəqibin üstünlüyü ilə yekunlaşmışdı. Macarıstan millisi ilə AVRO-2000-nin seçmə mərhələsindəki oyunlarımızda isə qapımızda ümumilikdə 7 qol görmüşdük. Belə ki, hər iki oyunda "quru” hesabla uduzan seçmə komandamız Bakıda dörd, Budapeştdə isə üç dəfə məyus olmuşdu.

AVRO-2016-da oyunları:

14 iyun. 20:00. Avstriya - Macarıstan

18 iyun. 20:00. İslandiya - Macarıstan

22 iyun. 20:00. Macarıstan - Portuqaliya

Tural Məmmədov