Azərbaycan televiziyası sözün əsl mənasında böyük bir inkişaf yolu qət edib. Müstəqillik dönəmindən bu yana bir çox kanallar yaradılıb. Hər kanalın da özünün çəkə biləcəyi bir yük olub. Amma Azərbaycan televiziya məkanında "İdman-Azərbaycan” kanalının xüsusi yeri var. Bu da əbəs yerə deyildir. Ölkə iqtisadiyyatının inkişaf etdiyi bir dövrdə bütün sahələrdə olduğu kimi, televiziyada da inkişaf özünü büruzə verirdi. Həmin dövrdə televiziya adamlarının ən çox müzakirə etdiyi məsələ profilli kanalların yaradılması idi. Əlbəttə ki, bu çətin, ağır məsuliyyəti öz üzərinə götürəcək, bazası bütün parametrlərə cavab verə biləcək güclü telekanala ehtiyac var idi. Azərbaycanın ana televiziyası sayılan AzTV tamaşaçıların istək və arzusunu doğru təhlil edərək öz bazasında "İdman Azərbaycan” telekanalını yaratdı. Doğma seyrçisinin ümidlərini doğrultmaq, zövqünü oxşamaq heç də asan məsələ deyil.

Gəlin razılaşaq ki, "İdman-Azərbaycan” kanalı fəaliyyətinin elə ilk günlərindəcə idmansevərlərin ürəyini fəth edə bildi. Biri-birindən maraqlı verilişlər, proqramlar kanalın inkşaf edəcəyindən, mütəmadi fəaliyyət göstərəcəyindən xəbər verirdi. 2009-cu ilin fevral ayından fəaliyyətə başlayan kanal inkişaf xəttini düzgün seçdi. Avropanın aparıcı çempionatlarını, həmçinin avrokubokların yayımını öz ana dilimizdə məhz bu kanalda nümayiş olundu. Özü də elə belə yox. Tam kefiyyətli şəkildə: uğurlu analiz və gözəl şərhlərlə… Hiss olunur ki, peşəkar aparıcı, şərhçi və redaktorların arxasında bir baş da artıq professional, işinə bələd adamlar dayanır.

Azərbaycan dilinin bütün qaydalarına riayət etmək hər kanala nəsib olmur. Bu kanalda xüsusən şərhçilərin və aparıcıların nitqinə, danışıq dilinə ciddi önəm verilir. Bunu əksər mütəxəssislər söyləyir. İllər növbələşdikcə, uğurlar bir-birini əvəz etməyə başladı. Yüksək nəticə göstərmək "İdman-Azərbaycan” telekanalının "alnına yazıldı”, amalına çevrildi. Əlbəttə ki, bu da əlavə zəhmət və məsuliyyət tələb edirdi. Amma profilli bir kanal kimi "İdman-Azərbaycan” bu sınaqdan da üzüağ çıxdı və öz seyriçilərini sevindirməkdə onlara kefiyyətli yayım, bir-birindən layihələr təqdim etməklə ümidləri doğrultdu. Kanal istər maddi–texniki, istərsə də yaradıcı tərəfdən hər mövsüm dəyişir, yeni layihələrlə tamaşaçıların görüşünə gəlir.

Gün ərzində "İdman-xəbər”in 5 canlı buraxılışı, üstəlik AzTV-nin xəbərlərinin və Səhər proqramının idman buraxılışları məhz bu peşəkar heyət tərəfindən rellaşdırılır. Azərbaycan futbol həvəskarları Çempionlar liqası və Avroliqanın, həmçinin İngiltərə premyer-liqası, İspaniya primerosu və Almaniya bundes liqasının bütün oyunlarını məhz bu kanaldan izləyirlər. Hər il dünyada milyonlarla tamaşaçının izlədiyi, ən bahalı idman növlərindən hesab olunan "Formula-1” yarışlarının da eksklüziv yayımçısı bu kanaldır. Ötən il Bakı ilk Avropa Oyunları zamanı bütün Avropa idman ictimaiyyətinin gözü bu yarışlarda idi. Azərbaycan kanalları arasında məhz "İdman Azərbaycan” oyunları ən yaxşı işıqlandıran kanal oldu. Bütün cüdo, güləş, gimnastika, taekvando, atçılıq, atıcılıq və boks yarışlarının da canlı yayımı məhz idman Azərbaycan telkekanalı ilə təşkil olunur.

İdmansevərlər voleybol üzrə ölkə çempionatı, Çempionlar Liqası və Avropa konfederasiyalar kubokunun görüşləri də məhz "İdman-Azərbaycan” kanalından izləyirlər. Bu gün də kanalın efirində «İdman həftəsi», «Premyer Liqa», «Avrofutbol», «İdman ensiklopediyası», «Flaqman», «Güləş Aləmi», «Olimp», «İdman ölkəsi», «İdman sağlamlığın rəhnidir», "Favorit”, "Telefitnes”, "İdman məbədi” kimi verilişlər efirə çıxır. Əlavə olaraq tamaşaçılar "Klassik boks” və «Qoalissimo» adlı telejurnallarla da tamaşaçıların görüşünə gəlir. Həqiqətən də bu kanal ölkəmizin idman həyatının əsl güzgüsünə çevrilib. Dördilliyin ən mühüm idman hadisəsi - Rio olimpiadası davam etdiyi bir müddətdə bu kanal gərgin iş rejimində çalışır və kanalın bütün əməkdaşları bu məsuliyyəti yaxşı dərk edirlər. Olimpiadanın müxtəlif yarışlarından xəbərlər, müsahibə və icmallar, şərhlər və analizlər, həmçinin cüdoçularımızın uğurları peşəkar səviyəyədə təqdim olunur. Ümidvarıq ki, növbəti idmançılarımızın qələbə xəbərlərini də məhz "İdman-Azərbaycan"dan izləyəcəyik. Fikrimcə, kanalın kadr siyasəti xüsusilə təqdiralayiq şəkildə aparılır.

Təcrübəli idman jurnalisti, hamımızın sevimlisi, kanalın baş redaktoru Fikrət Adıgözəlli, onun müavini, həm də tanınmış şərhçi Siyavuş Əliyev, şef-redaktor Vüqar Nəzərov və digərləri yaradıcı-müxbir heyətin uğurları yolunda hər gün yorulmadan çalışırlar. İsmayıl Abdullayev, Tural Məmmədli, Ramiz Mirzəzadə, Tərlan Şahinoğlu kimi şərhçilər isə istənilən idman profilli telekanalın arzu edə biləcəyi kollektiv üzvləridir. Rejissor heyətinin başında isə təcrübəli Valeh Əhmədov dayanır. Onunla yanaşı Səbuhi Manafov və Teyyub Məmmədov kimi gənc rejissorlar da müvəffəqiyyətlə çalışırlar. Telekanalın rejissorlarının peşəkarlığı efirin ilk dəqiqələrindən hiss olunur. Bu kanalın müxtəlif idman növləri üzrə canlı yayımları bütün idmansevərlərin ürəyincə olub.

Məncə, televiziyanın uğur göstəricisi tək sadaladığım xüsusiyyətlərlə bitmir. Bildiyimiz kimi birbaşa təsir vasitəsi olduğuna görə ölkədə fəaliyyət göstərən müxtəlif şirkətlər öz reklamlarını yaymaq üçün televiziyalar arasında seçim edir. Əbəs yerə deyil ki, yüz minlərlə tamaşaçısı olan "İdman-Azərbaycan” telekanalı bu baxımdan üst pillələrdə dayanır. Şəxsən mən idman sahəsində şirkət rəhbəri olsaydım, reklam və PR üçün tərəddüd etmədən "İdman-Azərbaycan”ı seçərdim.

Nəzərinizə çatdırım ki, alternativ olaraq yaradılan CBS sport kanalı məhz bu baxımdan axsayır. "İdman-Azərbaycan” kanalının da çatışmayan tərəfləri vardır. Fikrimcə, kefiyyətli veriliş hazırlamaq hələ işi tam görmək deyildir. Bunu tək efir vasitəsilə deyil, digər effektiv yollarla tamaşaçılara çatdırmaq vacibdir. Bilidiyimiz kimi dövrümüzün ən populyar təsir gücünə malik qüvvəsi sosial şəbəkələrdir. Məncə, idman sahəsində yaxşı proqramları göstərməkdən savayı, onu sosial şəbəkədə reklam etmək də kanala uğur gətirərdi. Hər halda bu mənim kanalın daimi izləyicisi kimi rəhbərlik qarşısında bir təklifimdir.

Mənə elə gəlir ki, bu yöndə təcili addımlar atmalıdır. Yazımın başlığında qeyd etdiyim kimi, Niyə "İdman-Azərbaycan”? sualına məncə az-çox aydınlıq gətirə bildim. Ən azından bu telekanalı ona görə izləyirəm ki, canlı efir vaxtı şərhçilərin "18+ lətifələrinə”, yaxud "qoldan sonra stadion sözün əsl mənasında partladı" kimi əcaib fikirlərə rast gəlmirəm. Həmçinin tez tez idman jurnalistlərinin yanıldığı "qola imza atdı”, "adını taploya yazdırdı”, "rəqibini yaxaladı” kimi ifadələr də efirdə işlədilmir. Əslində bir kanal üçün 7 il fəaliyyət dövrü elə çox deyil. Ancaq geriyə dönüb aparılan işlərə nəzər yetirdikdə görürsən ki, bu telekanal mümkün olmayan işlərin öhdəsindən layiqincə gəlib. Ümid edirəm ki, tutduğu bu yolda "İdman-Azərbaycan” kanalı daha da inkişaf edəcək və bizi yeni – yeni layihələrlə sevindirəcək.

Azərbaycan idmanına uğurlar!

Uğurlar, "İdman-Azərbaycan”!