Gənclər Liqasında Azərbaycanı təmsil edəcək "Qəbələ”nın "Çempionlar yolu”nun I mərhələsindəki rəqibi "Dinamo”nun heyətində tanış sima da yer alıb. Apasport.az saytının məlumatına görə, Moskva təmsilçisinin qapıçılar üzrə məşqçisi Azərbaycan futbolunun yetirməsidi.
 
Belə ki, Rusiyanı "Dinamo”nun 2-ci komandası təmsil edəcək. Sergey Çikeşevin baş məşqçisi olduğu bu komandanın çalışdırıcılar korpusunda yer alan Dmitri Lukoşkin isə Azərbaycan futbolsevərlərinə tanış addı.
 
1971-ci ildə Sumqayıtda anadan olan qapıçı bu şəhərin "Vosxod” klubunun çərçivəsini qoruyub. 2 həftə əvvəl 45 yaşını qeyd edən Lukoşkinin sumqayıtlıların heyətindəki parlaq oyunu diqqətdən kənarda qalmayıb.
 
Nəticədə 17 yaşlı istedad "Neftçi”yə keçib. Lakin "ağ-qaralar”ın heyətində olan rəqabətə tab gətirməyən qolkiper Sumqayıta dönüb. O, doğma şəhərdə "Xəzər”də oynamalı olub.
 
Azərbaycanın gənclərdən ibarət yığmasında çıxış edən Lukoşkin 1987-88-ci illərdə SSRİ-nin gənclərdən ibarət millisində də forma geyinib. İttifaq dağılandan sonra karyerasını Rusiyada davam etdirən qapıçı "Kuban” (Baraninsk) və OİK-in (Rostov) heyətində oynayıb. Kursk "Avanqard”ına keçən sumqayıtlı qapıçı Rusiya çempionatlarının I divizionunun tarixinə düşüb. O, bu liqada ən uzun quru seriyaya imza atıb – 834 dəqiqə.
 
Karyerasını başa vurandan sonra "Avanqard”, "Vityaz” və "OİK-Energiya”da çıxış edən Lukoşkin 2011-ci ildən "Dinamo”dadı. Bu 5 ildə akademiyada, sonra gənclər komandasında məşqçi fəaliyyəti göstərən həmyerlimiz 2 aydı
"Dinamo-2”dədi.
 
Qeyd edək ki, "Qəbələ” və "Dinamo” arasında ilk oyun sentyabrın 28-də ölkəmizdə keçiriləcək.