Son vaxtlar Azərbaycan futbolunun Avropa "vitrininə” çıxması, Azərbaycan klublarının Avropa səhnəsində yer alması, milli komandamızın isə Dünya çempionatının seçmə mərhələsində uğurla çıxış etməsi Türkiyə mətbuatının da gündəmində yer alır. Xüsusən milli komandamızın qazandığı nəticələrdən sonra qardaş ölkədə Azərbaycan futbolu haqqında hansı düşüncənin formalaşdığını bilmək maraqlı olardı. Bu məqsədlə Türkiyənin ən tanınmış idman yazarlarından olan Ahmet Çakırla söhbətləşmək qərarına gəldik.

-İlk olaraq Azərbaycan futbolu haqqındakı fikirlərinizi bilmək istərdik. Futbolumuz haqqında hansı məlumatlarınız var?

-Düzü, Azərbaycan futbolunu yaxından izləmək imkanım olmur. Əsasən üç səbəbdən dolayı sizin futbolla maraqlanırıq. İki ölkənin milli komandaları qarşı-qarşıya gələndə təbii ki, Türkiyədə Azərbaycan futboluna maraq artır. Bundan başqa, türkiyəli məşqçi və futbolçular sizin ölkəyə transfer olunanda Azərbaycan futbolu, həmyerlilərimizin yer aldığı klublar və əldə etdikləri nəticələr diqqət mərkəzimizdə olur. Hazırda isə "Qarabağ” və "Qəbələ”nin Avropa Liqasında çıxış etməsi səbəbindən Azərbaycan futboluna dair bilgimiz olur. Komandalarınızın uğuruna Türkiyə təmsilçilərinin uğuru kimi sevinirik. Azərbaycan futbolunun inkişafda olması gözdən yayınmır.

-Azərbaycanlı futbolçulardan kimləri tanıyırsınız?

-Vaxtilə "Kayserispor”, "Kocelispor” və "Eskişehirspor”da oynayan və Azərbaycan yığmasına yenildiyimiz oyunda Türkiyənin qapısına yol tapan Rəşad Sadıqovu, "Kocelispor”dan yadımda qalan Romal Hüseynovu, Kipr "Apollon"u ilə matçdan sonra Türkiyə bayrağını dalğalandıran, son vaxtlar isə futboldan kənar hadisələrlə daha çox gündəmə gələn Cavid Hüseynovu və təbii ki, "Trabzonspor”un üzvü Ramil Şeydayevi qeyd edə bilərəm. Bundan başqa, "Trabzonspor”un üç gənc azərbaycanlı futbolçunu sınaqdan keçirəcəyini mətbuatdan oxumuşam. Bundan əlavə, Trabzon klubunun aşağı yaş qruplarında top qovan bəzi futbolçuların gələcəkdə Azərbaycan yığmasına cəlb olunması haqqında danışıqların getdiyini eşitmişdim.

-Maraqlıdır, hər hansı Superliqa klubunun çalışdırıcısı olsaydınız, hansı azərbaycanlı oyunçunu komandanızda görmək istərdiniz?

-Hazırda 64 yaşım var və düşünürəm ki, bu mövzular haqda düşünməyim üçün artıq gecdir (gülür-red). Onsuz da bizim ölkəmizdə hamı könüllü məşqçidir. Məncə, mən idman yazarı olaraq qalsam, daha yaxşı olar. Ancaq onu deyim ki, iki ölkə arasında yaxşı əlaqələr olsa da, fedarasiyalar arasında bağların nisbətən zəifdir. Məncə, bu məsələdə işbirliyi daha möhkəm olmalıdır. Açığı, Türkiyə klublarının azəri futbolçuları heyətinə qatmamasını təəccüblə qarşılayıram. Xüsusən aşağı dəstə komandaları azərbaycanlı futbolçuları heyətinə qatmaqda maraqlı olmalıdır.

-İndiyə qədər ölkəmizdə aralarında Mustafa Denizli, Oğuz Çein, Rasim Kara, Bülent Korkmaz, Güvənc Kurtar kimi tanınmış simaların da yer aldığı 20-yə yaxın həmyerliniz çalışdı. Ancaq onların aktivində cəmi iki gümüş medal və bir ölkə kuboku var. Sizcə, türk məşqçilərin Azərbaycanda uğur qazanamaqda çətinlik çəkməsinin səbəbləri nələrdir?

-Azərbaycanda işləmiş türkiyəli mütəxəssislərlə bu haqda danışmadan nəsə demək çətindir, ancaq onu deyə bilərəm ki, heç vaxt orda çalışan hər hansı türk çalışdırıcıdan yaradılan şərait və yaşayış şərtləri haqqında mənfi fikir eşitməmişəm. Bildiyimə görə, hazırda Azərbaycanda türkiyəli məşqçi çalışmır və məncə, əsas məsələ də budur. Orda davamlı olaraq türk mütəxəssislər olmalıdır. Bunun üçün isə iki ölkənin federasiyaları daha sıx işləməlidirlər.

-Yuxarıda Azərbaycan futbolunu üç səbəbə görə izləmək imkanınızın olduğunu dediniz. Yeri gəlmişkən, bu gün meydana çıxacaq "Qarabağ” və "Qəbələ”nin, eləcə də Dünya çempionatının seçmə mərhələsində uğurla çıxış edən Azərbaycan milli komandasının nəticələrini necə qiymətləndirirsiniz?

-Avropa Liqasında çıxış edən və ilk 3 matçdan sonra 4 xal toplayan "Qarabağ” qrupdan çıxmaq şansına sahibdir. "Fiorentina”, PAOK və "Sloven”i geridə qoyaraq növbəti mərhələyə adlaya bilər. "Qəbələ”yə gəlincə, komanda qrupdan çıxmaq şansını itirsə də, doğma meydanda "Sent-Etyen” və "Anderlext”ə çətin anlar yaşadacağına şübhə yoxdur. Təsadüfi deyil ki, bugünkü rəqiblə Fransadakı oyun da meydan sahibləri üçün asan olmamışdı. Elə "Maynts”da "Qəbələ”ni çətinliklə üstələmişdi. Azərbaycan milli komandası haqqında isə onu deyə bilərəm ki, ilk üç oyunda 7 xal toplayan komandanız böyük sıçrayış göstərdi. San-Marino yığmasını məğlub etmək belə asan is sayılmır, amma Azərbaycan bunu bacarmaqla yanaşı, Norveçə qalib gəlməyi və Çexiya səfərindən bir xalla dönməyi bacardı. Təsadüfi deyil ki, bu nəticələr Türkiyə mediasında "Azərbaycan tarix yazır” başlığı ilə oxuculara təqdim olunmuşdu. Məncə, qrupdan çıxmaq mümkün olmayacaq, ancaq bu cür uğurlar ölkə futbolunun inkişafına xidmət edir.

-Yeri gəlmişkən, milli komandamızın çalışdırıcısı Robert Prosineçki Azərbaycana gəlməmişdən öncə "Kayserispor”da çalışırdı. Xorvat mütəxəssis haqqında düşüncələrinizi bilmək maraqlı olardı.

-Məncə, Prosineçki haqqında geniş dəyərləndirməyə ehtiyac yoxdur. "Kayserispor”da çalışanda "Beçiktaş”ın gündəminə gəlmişdi, ancaq sonra bu keçib baş tutmadı. Məşqçi kimi həmişə qələbəyə oynamağı sevir. Futbolçuların inkişafında rolunun olması da danılmazdır. Bir sözlə, futbolçu kimi yaxşı karyerası olan Prosineçkinin məşqçi kimi də yaxşı perspektiv vəd etdiyini demək olar.

-Son illərdə milli komandamızda xeyli sayda türk futbolçu çıxış edib. Son olaraq isə "Bursaspor”lu Dəniz Yılmaz Azərbaycan vətəndaşlığını qəbul etdi. Türkiyəli futbolçuların Azərbaycan millisində forma geyməsini necə qarşılayırsınız?

-Görəsən, hələ də bu mövzunu problemə çevirən kimsə var? Vaxtilə Məsut Özil, İlkay Gündoğan kimi türkəsilli oyunçular Almaniya milli komandasını seçərkən bu məsələ ölkəmizdə birmənalı qarşılanmamışdı. Ancaq indi bu cür problemlər geridə qalıb. Bu üzdən türk futbolçuların Azərbaycan yığmasında top qovmasının hamı tərəfindən adi qarşılanacağını düşünürəm. Ən azı ona görə ki, iki ölkə arasında özəl bağlar var. Axı biz "iki dövlət, bir millətik”. Odur ki, türkiyəli futbolçuların Azərbaycan millisinin uğurlarında pay sahibi olması bizi yalnız sevindirə bilər.

-Milli komanda mövzusuna toxunmuşkən, Türkiyə yığması haqqında da danışmaq maraqlı olardı. Sizcə, Türkiyə milli komandasının gözləntilərdən aşağı çıxış etməsinin səbəbi nədir?

-AVRO-2016-nın gedişində komanda daxilində yaranmış problem hələ də özünü göstərməkdədir. Onsuz da yaxşı vəziyyətdə olmayan komanda bu problemlərlə bir qədər də gerilədi. Bunun nəticəsi kimi seçmə mərhələyə uğursuz başladıq. Xorvatiya səfərindən xalla dönən yığmanın həmin matçda aşkar şəkildə bəxti gətirmişdi, amma bunun digər qarşılaşmalarda da davam etməsini gözləməyə dəyməzdi və belə də oldu. Ukrayna ilə oyunda bir xalı çətinliklə əldə edən milli komandamız İslandiya seçməsi ilə oyunda yenilgidən qaça bilmədi. Qarşıda bizi Kosova və Finlandiya kimi nisbətən zəif rəqiblərlə oyunlar gözlədiyindən milli komandamızın qazanacağı qələbələrlə vəziyyəti düzəldəcəyinə ümid edirik, ancaq bu özümüzü aldatmaqdan başqa bir şey deyil, çünki əslində düşdüyümüz çətinlikdən çıxmağın yolunu tapa bilməmişik.

-AVRO-2016-dan sonra yığmaya dəvət edilməyən Arda Turan, Burak Yılmaz, Səlcuk İnan və Gökhan Gönül kimi oyunçular hələ də milliyə dəvət olunmur. Bu məsələni və ümumiyyətlə, baş məşqçi Fatih Terimlə həmin futbolçular arasında yaşanan problemi necə qiymətləndirirsiniz?

-Düzü, sözügedən futbolçularla Fatih Terim arasında nələrin yaşandığı tam məlum deyil. Mediaya sızan bəzi bilgilər olsa da, bütün bunlar problemə tam aydınlıq gətirmədi. Onu qeyd edə bilərəm ki, məncə, Terim yaranmış problemin həlli ilə bağlı üzərinə düşəni istənilən kimi edə bilmədi və bu milli komandaya mənfi təsir göstərdi. Yadınızdadırsa, AVRO-2016-dan sonra Caner Erkin və Hakan Balta da yığmadan kənar qalmışdı, amma sonradan seçmə komandaya qoşuldular. Onlar kimi Arda, boşluğu doldurula bilməyən Burak və Gökhan Gönülün də yenidən ay-ulduzlu formanı geyəcəyinə inanıram. Səlçuk İnanın isə nisbətən yaşlı olması və alternativlərinin çox olmasından dolayı milli komandaya çağrılmasını gözləmirəm.

-Sizi "Qalatasaray” azarkeşi kimi tanıyırıq. Azərbacanda da "cim-bom”un xeyli sayda tərəfdarı var. Onlara nə demək istərdiniz?

-Hamısını salamlayıram. Dünyanın əksər ölkələrində olduğu kimi, Azərbaycanda da "sarı-qırmızılılar”ın xeyli sayda azarkeşinin olduğunu bilirəm. Məncə, bundan yaxşı mənada istifadə etmək lazımdır. "Qalatasaray” hazırlıq proqramına Azərbaycana səfər etməyi də daxil etməlidir. Yadınızdadırsa, bir müddət əvvəl Türkiyə Super kubokunun Bakıda keçirilməsi gözlənilirdi, ancaq sonradan alınmadı. Fikirimcə, belə matçları Azərbaycanda keçirmək olar.

 

Söhbətləşdi: Tural Məmmədov

 

 

 

Xəbərdən istifadə edərkən istinad etmək vacibdir.