Sabah milli komandamız Dünya çempionatının seçmə mərhələsində növbəti matçına çıxacaq. İlk üç oyunda 7 xal toplamqla adından söz etdirən və AFFA-nın Norveç milli komandası ilə Bakıdakı oyundan sonra cari seçmə mərhələ üçün seçdiyi "Niyə də yox?” şüarını dillər əzbərinə çevirən Robert Prosineçkinin komandası yenə hamının diqqətini özünə cəlb etməkdədir. Yerli futbol ictimaiyyəti Şimali İrlandiya ilə oyundan sonra milli komandamızın Rusiyada keçiriləcək Dünya çempionatına bir az da yaxınlaşmasını arzulayır. "Niyə də yox?” şüarı nə qədər yaxşı səslənsə də, bu məqamda romantikayla reallığın sərhədlərini ən azı şüarın özü qədər yaxşı müəyyən etmək lazımdır. Bəs görəsən, Azərbaycan yığmasının DÇ xəyalları nə qədər realdır?

Bizə daha neçə xal bəs edə bilər?

Mundiala birbaşa vəsiqə qazanmaq dəryada balıq sevdasından başqa bir şey deyil. Yığmamızla eyni qrupda yer alan Almaniyanın ilk pilləni heç kimə güzəştə getməyəcəyi asan proqnoza gələn məsələdir. Deməli, milli komandamız üçün ən ağlabatan variant pley-off mərhələsinə vəsiqə qazanmaq üçün oynamaqdır. Yetər ki, ən zəif ikinci olmaqla kənarda qalmayaq. Yadınızdadırsa, son mundialın seçmə mərhələsinin sonunda 16 xalla ən pis qrup ikincisi olan Danimarka Brazilyadakı mundialda qatılmaq hüququnu pley-off mərhələsinə yüksəlmədən itirmişdi. Danimarka millisindən söz düşmüşkən, qeyd edək ki, o vaxt sözügedən komanda 16 xalla ən pis nəticəyə malik qrup ikincisi olmuşdu. O vaxt qalan 8 komandadan üçü 17, beşi isə daha çox xal yığa bilmişdi. Bu məntiqlə pley-off mərhələsinə adlamaq üçün minimum 17 xal yığmaq lazımdır. Məsələyə bu cür yanaşsaq, aktivində 7 xal olan Robert Prosineçkinin "drujinası” daha 10 xal yığmaqla qrup ikincisi ola bilər. Bunun üçün isə seçmə komandamız sabah ən azı oyunu yenilgisiz başa vurmalıdır. Belə olduqda ən yaxın izləyicimiz olan Şimali İrlandiyanın Azərbaycan yığması ilə xal fəriqini azalda bilməyəcək. "Uindzor Park”da qazanılacaq qələbə isə komandamız üçün ikiqat üstünlük olacaq. Başqa sözlə, Belfast qarşılaşmasını tərəflər üçün "6 xallıq oyun” adlandırmaq olar. Ancaq son Avropa çempionatının iştirakçısı ilə matçda məğlubiyyət də millimizi hədəfdən yayındırmamalıdır. Mümkün məğlubiyyətin əvəzini Bakıda çıxmaqla itirilmiş xalları siğortalamaq olar. Ən azı 17 xallıq hədəfə çatmaq üçün isə doğma meydandakı qarşılaşmalardan qalib ayrılmaq lazımdır. Almaniya ilə həm doğma publika qarşısında, həm də səfərdə mümkün iki məğlubiyyət də xal ehtiyatımızı 17-yə qaldırmağa mane olmamalıdır. Evdə San-Marino, Şimali İrlandiya və Çexiya üzərində qazanılacaq üç qələbə ilə xallarının sayını 16-ya çatdırmaq mümkündür. Norveç səfərində qazanılacaq bir xal isə milli komandamızı xoşbəxt sonluğa çatdıra bilər. Eyni zamanda unutmaq olmaz ki, 17 xal həddi nisbidir. Bu, komandaların nəticələrindən asılı olaraq, azala və ya arta bilər. Hətta 17 xalın qrup ikincisi olmaq üçün yetmədiyi və ya 15 xalla da pley-offa qatılmağın mümkünlüyünü nəzərə almalıyıq.

Ev qələbələrinə niyə inanmaq olar?

Yuxarıda da qeyd etdiyimiz kimi, Almaniya seçmə komandası ilə Bakıdakı görüşdə nəinki üç, heç bir xal da qazanmaq real görünmür. Amma digər ev oyunlarında qələbə haqda düşünmək üçün əsas var. Məsələ burasındadır ki, hazırda həm milli komandanın özünə inamı xeyli artıb, həm də qrupdakı rəqiblər elə də güclü kollektivlər deyil. Məsələn, elə sabahkı rəqib Şimali İrlandiya daha öncə seçmə mərhələdə dörd xal aldığımız komandadır. Yadınızdadırsa, iki il öncə Brazilyada keçirilən mundialın seçmə mərhələsində səfərdən matça əlavə olunmuş dəqiqələrdə buraxdığı qolla (1:1) bir xalla dönən komandamız həmin kollektivi evdə iki cavabsız qolla üstələmişdi. Deməli, bu komandanı ən azı Bakıdan əliboş yola salmaq olar.

San-Marino ilə matç isə şübhəsiz üç xal qazanılması gərək olan qarşılaşmadır. Seçmə mərhələnin ilk oyununda səfərdə minimal hesabla üstələdiyimiz "cırtdan”la cavab görüşündə üç xal əldə etməmək ölkə futbolu adına faciə olardı. Ancaq Azərbaycan yığmasının San-Marino qarşısında xal itirməsi inandırıcı görünmür.

Oktyabrda səfərdə qolsuz heç-heçə etdiyimiz Çexiya yığması da hazırda Robert Prosineçkinin komandası üçün münasib rəqibdir. Bu isə onunla əlaqədardır ki, Karel Yarolimin rəhbərlik etdiyi yığma bəlkə də tarixinin ən çətin günlərini yaşayır. Milli komandamızla qarşıaşmada öncəki oyunla müqayisədə 7 dəyişiklik edən çalışdırıcının Avropa çempionatının final mərhələsindən sonra komandanı yenidən formalaşdırdığını demək olar. Təsadüfi deyil ki, baş məşqçi hələ də heyəti komplektləşdirməkdə çətinlik çəkir.

 

Osloda xal olsa...

Yuxarıda da qeyd etdiyimiz kimi, sabah milli komandamız səfərdən əliboş qayıtsa belə, bu nəticə imkanların üstündən xətt çəkməyəcək. Məsələn, əgər komandamız Norveç millisi ilə sonuncu səfər matçında (0:0) olduğu kimi, Oslodan xalla qayıtsa, o zaman pley-off arzusunu reallaşdıra bilər.

 

Xatırladaq ki, Şimali İrlandiya millisi ilə oyunla ilə yekun vuracaq Robert Prosineçkinin komandası Norveç yığması ilə gələn ilin sentyabrında qarşılaşacaq. Bu görüşdən əvvəl isə bizi Almaniya və Şimali İrlandiya milli komandaları ilə görüşlər gözləyir. Norveç seçməsi ilə oyundan üç gün sonra San-Marinonu, ondan bir ay sonra isə Çexiyanı qonaq edəcək millimiz qrupun son matçına isə Almaniyada çıxacaq.

Milli komandamızın işini çətinləşdirən məqamlar

Seçmə komandamızın 2018-ci ildə Rusiyada təşkil olunacaq Dünya çempionatına vəsiqə əldə etməsi heç də öhdəsindən asanlıqla gəlinəsi tapşırıq deyil, amma ilk üç oyunda qazanılan nəticələr yerli futbol ictimaiyyətinin ümidlərini xeyli artırmaqdadır. Ancaq artan təkcə ümidlərimiz deyil. Məsələ burasındadır ki, hazırda qrup ikincisi olan və ilk üç görüşdə qapısının toxunulmazlığını qoruyan milli komandamıza rəqiblərinin diqqəti də əvvəlkindən fərqlənir. Belə ki, əgər indiyə kimi, rəqiblər azərbaycanlı futbolçulara yuxarıdan aşağı baxırdılarsa, indi bundan söhbət belə gedə bilməz. Milli komandamızın ciddi rəqib kimi qəbul olunması nə qədər xoş olsa da, bir o qədər də millimizin işini çətinləşdirən məqamlardandır.

Robert Prosineçkinin rəhbərlik etdiyi milli komandamız cari seçmə mərhələdə qalib gəldiyi heç bir qarşılaşmada o qədər də yaxşı təsir bağışlamamışdı. Təsadüfi deyil ki, həm San-Marino, həm də Norveçlə oyunlarda qazanılan qələbədən sonra yığma komanda tənqid olunmuşdu. Heç Çexiya yığması ilə görüşün ilk hissəsində də istənilən səviyyədə oyun sərgilənməmişdi. Yəqin ki, heç kim qazanılan nəticələrdə bəxt amilinin rol oynadığını inkar etmir. Ancaq heç kim də "Futbol Tanrısı”nın qarşıdakı matçlarda bizimlə olacağına zəmanət verə bilməz. Bəxt amili olmadan isə işimizin çox çətin olacağına şübhə yoxdur.

Vurğulanmalı olan daha bir məqam isə yığma komandamızın sabahkı görüşdə mümkün məğlubiyyətinin kollektivə necə təsir edəcəyi məsələsidir. Başqa sözlə, daha çox əhval-ruhiyyə komandası kimi tanınan seçmə komandamız sabah Şimali İrlandiyaya, xal qazanmaq ehtimalımızın minumum olduğu sonrakı oyunda isə Almaniya millisinə yenilsə, komadadaxili vəziyyətin necə olacağı, hansı nəticələrin qazanılacağı asan proqnoza gələn məsələ deyil.

Tural Məmmədov

Xeberle.com

Xəbərdən istifadə edərkən istinad etmək vacibdir.