Sumqayıt şəhər Gənclər və İdman Baş İdarəsinin nəzdində fəaliyyət göstərən Mehdi Hüseynzadə adına futbol stadionu sözün əsil mənasında təcavüzə məruz qalıb. Bir vaxtlar ölkənin ən yaxşı stadionu hesab olunan bu arenanın bu günkü görkəmi ürək ağrıdır. Hazırda stadionun ideal ot örtüyündən əsər-əlamət qalmayıb. Şanlı tarixə malik stadion bu gün göz görə-görə dağılıb gedir.
Bir vaxtlar bu stadionda top qovan Sumqayıt futbol məktəbinin yetirməsi Kamal Quliyev də hökm sürən bu bərbad vəziyyətdən narahatdır. Sumqayıt şəhər stadionu 1966-cı ildə istifadəyə verilib. Bu arenada ilk futbol oyunu, SSRİ çempionatının "B” qrupunda çıxış edən Sumqayıtın "Polad" komandası ilə Belaya Kolitva şəhərinin eyni adlı kollektivi arasında olub. İlk beynəlxalq görüş 1982-ci ildə Azərbaycanın yeniyetmə futbolçulardan ibarət komandası ilə İran millisi arasında keçirilib. Üç il sonra isə arena gənclərdən ibarət Çin və Paraqvay millilərinin dünya birinciliyi oyununa ev sahibliyi edib. Azərbaycanda keçirilən ilk avrokubok oyunları da bu məkana təyinat alıblar. Bu meydan ölkə kubokunun və Superkubokun yeni sahiblərini də müəyyən edib. Olimpiya yığmamız da uzun illər ev oyunlarını bu stadionda keçirib. Kamal Quliyev isə ilk dəfə Sumqayıt şəhər stadionunda Xəzər klubunun heyətində top qovub. Gözəlliyi ilə göz oxşayan Nəsimi parkı ilə Sumqayıtın yeni bulvarı arasında yerləşən Mehdi Hüseynzadə adına stadion mövcud görkəmi ilə ətraf panoramı eybəcərləşdirir. Arena çox bərbad vəziyyətdədir. Taxta oturacaqlar bir-bir sıradan çıxır. Əsas tribuna ilə üz-üzə və eləcə də qapılar arxasında yerləşən tribunalar isə çoxdan dağılıb gedib. İndi buralar sanki daş qəbiristanlığını xatırladır. Elektron tablo hələ 2001-ci ildə burada təmir işləri görən qaynaqçıların məsuliyyətsizliyi ucbatından yanaraq kül olub. Bir sözlə, bir vaxtlar ölkənin ən baxımlı, ən gözəl arenalarından olan stadion çox acınacaqlı vəziyyətdədir. Üç il öncə arenanın əsaslı təmirinə dövlət səviyyəsində qərar verilib və yeni layihə də hazırlanıb. Plana görə stadion sonradan 40 minə çatdırılmaq şərti ilə 15 min tamaşaçı tutumuna malik olmalı, 2015-ci ildə isə arena təhvil verilməli idi. Artıq 2016-ci il də başa çatır. Ancaq nə pul ayıran var, nə də iş görən. Ortada isə gördüyünüz bu acı mənzərədən başqa heç nə yoxdur. Amma ümid sonda ölür. Stadionun direktoru Nadir Quliyev deyir ki, artıq arenaya baxış keçirilib və yeni layihənin hazırlanması üzərində iş gedir. "İnşaatçı” Sumqayıt şəhər Mehdi Hüseynzadə adına stadiondan əvvəl baş arena olub. 1954-cü ildə istifadəyə verilən stadion uzun müddət ölkə futboluna sədaqətlə qulluq edib. Bir çox komandalara qucaq açan stadionun hazırkı durumu ürək ağrıdır. Bir vaxtlar 10 minə yaxın azarkeşin toplaşdığı tribunalar tamamilə dağılıb. Taxtalar və qoruyucu dəmir dirəklər çıxardılaraq satılıb. Tribunalardan əlavə, stadionun ot örtüyü və digər avadanlıqları da yararsız vəziyyətə düşüb. Futbol meydançası indi qoyun-quzu otlağına çevrilib. Burda quşçuluq təsərrüfatının cücərtilərini də görmək olar. Bir vaxtlar futbolçuların top qovduqları stadionda, bu gün toyuqlar bir-birlərini qovurlar. Bu da təbii haldır. Hazırda baxımsızlıq dövrünü yaşayan ərazidə qaçqın və məcburi köçkün ailələri məskunlaşıb. Stadion rəhbərliyini yerində tapa bilməsək də, Sumqayıt şəhər Gənclər və İdman Baş İdarəsindən vəziyyətlə bağlı suallarımıza şifahi də olsa cavab tapa bildik. İdarədən bildirdilər ki, "İnşaatçı” stadionunda heç bir təmir işləri aparılamayacaq. Görünür futbolsevərlər hələ bir müddət də gözləməli olacaqlar. İndi hər şey aidiyyatı qurumların vədlərinə əməl etmələrindən asılıdır. Vəd böyüdükcə isə inam azalır. Çalışaq ki, inamımızı itirməyək.
Xəbərdən istifadə edərkən istinad etmək vacibdir.
