"Artıq dünya açıq dünyadır, diplomatiya elmi o qədər də uğurlu elm kimi görünmür. Bu gün gücün ağıla, hüquqa qalib gəldiyi bir dövrdə bəzən daha çox istiqanlılıq, daha dürüst yol daha uğurlu yol hesab edilə bilər”.
Xeberle.com xəbər verir ki, bu sözləri Bakıda keçiriləcək İslam Həmyəyliyi Oyunları barədə Modern.az-a danışan millət vəkili Fəzail İbrahimli bildirib.
"Bakıda İslam Həmrəyliyi Oyunlarının planlaşdırılması, prezidentin islam ölkələrinə mütəmadi səfərləri bir sıra düşüncələrə əsas verir. Əvvəla artıq dünyada İslama qarşı cihad elan olunub, Yaxın Şərq hadisələri bunu göstərir. Çox təəssüf ki, İslama qarşı cihad elan etmiş ölkələr bunu axıra qədər dərk eləmir, başqa bir qrup isə cihad edənlərin arzusundadır. İqtisadiyyatı, siyasəti hamısı o planı quranların əlində olduğu üçün onlar öz ağalarının üzlərinə ağ ola bilmir. Nəticədə İslam dünyası parçalanır, İslam dünyasına divan tutulur, İslama qarşı əxlaqsız düşüncələr başlayır və sair. Bu cəhətdən İslam Həmrəyliyi Oyunları İslam dünyasının oyanışına, İslam əxlaqının dürüstlüyünə bir mesajdır.
Azərbaycan sanki bu mənada özünü İslam dünyasının mərkəzi kimi görür. O mənada ki, Azərbaycanın atdığı addımlar, tolerant ölkə olması, İslam dəyərlərinə münasibət - bütün bunlar hamısı imkan verir ki, İslam həmrəyliyi ilə bağlı düşüncələr ortaya qoysun, qayğıkeşlik göstərsin və sair. Dünya da Azərbaycanı indi belə görür.
Bu oyunların Bakıda keçirilməsi həmrəyliyə kifayət qədər rəvac verən məsələdir. Güman edirəm ki, Azərbaycan İslam aləmində aparıcı bir rol oynamaqla, İslam aləmində siyasi sabitliyin əldə edilməsinə töhfə verə bilər. Eyni zamanda bu oyunlar Azərbaycanın İslam aləminə çıxması üçün kifayət qədər zəmin verə bilər. Biz I Avropa Oyunlarında böyük təşkilatçılıq məktəbi keçmişik və o məktəb ən yük həddinə gəlib çıxıb. Ona görə də İslan Həmrəyliyi Oyunlarında hər şeyin rəvan olacağına əminəm.
Tolerant bir ölkə kimi milli, irqi, dini ayrı-seçkiliyə yox deməklə Azərbaycan dünyada tanınıb. Xristian dünyasından Azərbaycana gələn hər bir şəxs arzu edir ki, onun da dövlətində xristiana bu qədər önəm verilsin. İslam həmrəyliyi deyəndə o demək deyil ki, bu həmrəylik xristian dünyasına qarşıdır. İslam həmrəyliyi dostluğu, münasibəti formalaşdıran bir məfhumdur. İslam Həmrəyliyi dünyaya mehribançılıq ideyalarını yayır”.
Xəbərdən istifadə edərkən istinad etmək vacibdir.
