"Ədalət" qəzeti məşhur idmançılarla bağlı silsilə yazılarını davam etdirir. Rubrikamızın bu dəfəki qəhrəmanı Zaur Tağızadədir. O Zaur Tağızadə ki, 15 il öncə - 1999-cu ildə Bakıda Portuqaliya millisi ilə keçirdiyimiz rəsmi görüşdə vurduğu qolla bəlkə də neçə onilliklər xatırlanacaq. Futbolçunun şəxsi keyfiyyətlərinə və digər məsələlərə keçməzdən öncə karyerasındakı maraqlı məqamlara nəzər salaq. 

1979-cu ilin fevral ayının 21-də Bakıda anadan olan Zaur karyerası ərzində 7 klubun şərəfini qoruyub. Bunlar Mingəçevirin "Kür Nur", Bakının "Şəfa", "Neftçi" komandaları, Estoniyanın "Flora"(Tallin) və "Lelle" kollektivləri, İslandiyanın "Akranes" klublarıdır. Futbolçu karyerasına 1994-95-ci illər mövsümündə hazırda mövcud olmayan "Kür Nur" kollektivində başlayan Tağızadə burda keçirdiyi 10 oyunda 4 qol vurub. İki ildən sonra isə Estoniyanın"Lelle" komandasında legioner həyatı yaşayıb. 
Amma buna daha çox cəhd etmək demək olar. Çünki Zaur bu komandada cəmi 6 oyuna çıxıb və 2 dəfə fərqlənib. Bu komandanı tərk etdikdən sonra İslandiyanın "Akranes" komandası ilə müqavilə imzalayan gələcəyin ulduzu burda da uzun müddət davam gətirə bilməyib. Üç oyunda meydana çıxıb 1 qol vuran Tağızadə elə həmin il vətənə qayıdır və o vaxtlar AFFA-nın qeyri-rəsmi olaraq himayə etdiyi "Şəfa"ya keçir. 
Maraqlıdır ki, ulduzu parlamaqda olan Zaur burda da uzun müddət davam gətirə bilməyib. Belə ki, o dövrün ən yaxşı şəraitli və məvacibli komandalarından hesab olunan "Şəfa"da 16 oyuna 4 qol vuran futbolçu bu dəfə Estoniyanın başqa bir klubu - "Flora"yla anlaşır. "Flora" (Tallin) klubunda Zaur 9 oyun oynayır və 1 qol vurur. 
Elə hər şey də bundan sonra başlayır. Belə ki, 1999-cu ildə yenidən vətənə dönən Zaur bir müddət MOİK-in heyətində çıxış edir və burda keçirdiyi 10 oyunda 2 qola imza atır.

Bütün bu gedişatlardan sonra Tağızadə uzun müddət bir komandada qərar tuta bilir. Bu istedada sahib çıxan xoşbəxt kollektiv isə "Şəfa" olur. Həmin dövrdə yazılanlara inansaq, futbolçunun "Şəfa"ya keçməyi birbaşa AFFA prezidenti Fuad Musayevin tapşırığı olub. Amma bəzi mənbələr isə hesab edir ki, Musayev Tağızadəni futbolçu kimi "məhv etmək" üçün onu qeyri-rəsmi olaraq himayə etdiyi komandaya gətiribmiş. İstənilən halda bu faktdır ki, Zaur 2000-2004-cü illəri məhz bu komandada keçirir. Keçirdiyi 100 oyunda isə 17 dəfə fərqlənə bilir.

2004-cü ildən etibarən Azərbaycanda yeni komandalar yaranmağa başlayır, bir çox klubların mövcudluğuna isə son verilir. Elə həmin komandalardan biri də paytaxtın "Şəfa" komandası idi. Təbii ki, Tağızadə həmin illərdə çox məşhur idi. Çünki əvvəldə də qeyd etdiyim kimi Portuqaliyaya vurduğu möhtəşəm qol onu nəinki Azərbaycanda, hətta MDB məkannda tanıtmışdı. Çünki bir neçə ay öncə əfsanəvi Luiş Fiqunun lideri olduğu yığmaya 7:0 hesablı biabırçı məğlubiyyətə uğrayan komandanın Bakıda həmin kollektivi çətin duruma salması əsl fantastika idi.

2004-cü ildən etibarən Tağızadənin "Neftçi" karyerası başlayır. Özü də necəg Bu komandanın heyətində 6 il ərzində 132 oyuna çıxan istedadlı yarımmüdafiəçi 31 qola imza atır. Amma zədələr Azərbaycan futbolunun "qızıl oğlan"ından əl çəkmir ki, çəkmir. Belə ki, 26 iyul 2008-ci ildə UEFA "İntertoto" kubokunda Rumıniyanın "Vasluy" komandası ilə qarşılaşmada zədələnən "qızıl oğlan" 217 gün meydana çıxmır. Nəhayət 2009-cu ilin mart ayının 1-də "Qəbələ" ilə qarşılaşmada Tağızadə bu uğursuzluğa "dur" deyir. Zaurun karyerası ilə bağlı digər bir maraqlı məqam da var. Belə ki, 2008-ci ilin fevral ayının 23-də Sumqayıtın "Gənclərbirliyi" komandasında vurduğu qoldan sonra nə az, nə çox düz 414 gün qol vura bilməyib və bu seriyanı 2009-cu ilin aprel ayında "Xəzər Lənkəran"la oyunda qırmağı bacarıb. 

Nə qədər qəribə də olsa, futbolçu 2010-cu ildə "Neftçi"dən müəmmalı şəkildə uzaqlaşdırılır və karyerasını bitirmək qərarına gəlir. Bu yerdə başqa bir məqama diqqət çəkmək yerinə düşərdi. Mətbuatın yazdığına inansaq, Tağızadənin "Neftçi"dəki karyerasının pik vaxtlarında paytaxt klubunun prinsipial rəqibinə çevrilən "Xəzər Lənkəran" Zaura astronomik məbləğ təklif edir. Hər halda təxminən 8-10 il əvvəl Zaura lənkəranlılar tərəfindən bir milyonluq müqavilə təklif edilmişdi. Amma o buna razı olmamışdı. Məbləğin astronomik olmağına gəlincə, nəinki on il əvvəl, heç indi də heç bir azərbaycanlı oyunçunun transferi üçün bu məbləğ təklif edilməyib.

Xarakteri

Zauru şəxsən tanıyanlar, komanda yoldaşları onun əsl lider olduğu qənaətindədirlər. Hətta çıxış etdiyi komandaların baş məşqçilərinin də "qızıl oğlan"dan açıq aşkar ehtiyatlandığını deyənlər var. Tağızadənin futbolla vidalaşması ilə bağlı məsələyə gəlincə, burda da yetərincə maraqlı nüanslara rast gəlmək mümkündür. Deməli, 2011-ci ilin may ayının 19-da Bakıda keçirilən "Neftçi" - "Xəzər Lənkəran" qarşılaşmasından əvvəl paytaxt klubu Zaur Tağızadənin futbolla vidalaşmaq tədbiri təşkil edəcəkdi. Lakin Zaur Tağızadə ölkədə olmadığı üçün bu tədbir baş tutmadı. Amma deyilənlərə görə, Zaur "Neftçi"dən incik ayrıldığına görə qəsdən belə etmişdi.

İndi isə milli karyerası barədə. Zaur Tağızadə Azərbaycan milli futbol komandasına ilk dəfə 1997-ci ildə 18 yaşında dəvət alıb. Millidə debütünü 4 iyun 1997-ci ildə yoldaşlıq görüşündə Estoniya yığmasına qarşı keçirilən oyunda edib. İlk qolunu isə 199-cu ilin iyun ayının 5-də Bakıda Lixtenşteyn millisi ilə keçirdiyimiz (4:0) oyunda vurub. Yığma formasında 40 dəfə meydana çıxan sağ cinah oyunçusu 6 qola imza atıb. Futbolçu milli komandada 2811 dəqiqə meydanda olub, 8 sarı, 1 qırmızı vərəqə qalıb. 2009-cu ildə öz istəyi ilə milli komanda karyerasını başa vurub

Futbolçu karyerasını başa vuran Zaur "Neftçi"dən köməkçi-məşqçi işləmək təklifi alsa da, qəbul etmir. Səbəb kimi isə bu iş üçün gənc olduğunu və yalnız bir neçə ildən sonra məşqçi ola biləcəyini göstərir. 2010-cu ildə "Neftçi"nin əvəzedici heyətinə məşqçisi təyin olunan gənc mütəxəssis bir il sonra Qurban Qurbanovun istəyi ilə "Qarabağ"a keçir və hazırda da Ağdam təmsilçisində seleksiyaçı məşqçi işləyir

İntiqam Valehoğlu