Sumqayıtı Azərbaycan Premyer-Liqasında təmsil edən “Sumqayıt” klubunda maliyyə böhranı yaşanır. Futbolçuların məvacibləri 2 aydır ki,verilmir. 

Publika.az-a bu barədə məlumatı futbolçuların özləri veriblər. Təzyiqlərə tuş gələcəklərini nəzərə alaraq, adlarını açıqlamaq istəmədiyimiz futbolçular klubun prezidenti Kamran Quliyevdən narazıdırlar.

Futbolçular  bildirirlər ki, klub prezidenti onlara məvaciblərin veriləcəyi ilə bağlı bir neçə dəfə söz versə də, vədinə əməl etməyib.

Şikayətçilər  iddia edirlər ki, klub prezidenti onların məvacibini bu yaxınlarda Londona səfər edərkən xərclədiyindən, indi maaşlarını ala bilmirlər.

İttiham yetərincə ciddi olduğundan məsələyə klub prezidentinin də münasibətini öyrənmək istədik.  Kamran Quliyev zənglərimizə cavab vermədi.

Klubun mətbuat xidmətinin rəhbəri Rəşad Məmmədov isə Publika.az-a açıqlamasında deyilənləri təkzib etdi: “Bu məlumatın heç bir əsası yoxdu.

Futbolçulara olan borc tamamilə ödənilib. “Rəvan”la oyundan bir gün əvvəl bütün futbolçuların məvacibi qəpiyinə qədər ödənilib”.

Qeyd edək ki, “Sumqayıt” “Rəvan”la fevralın 14-də qarşılaşıb.