Sumqayıt şəhər Gənclər və İdman Baş İdarəsi və Təhsil şöbəsinin təşkilatçılığı ilə  M.Hüseynzadə adına şəhər stadionunda “Cəsurlar” Respublika hərbi-idman və turizm oyununun şəhər birinciliyinin final mərhələsi keçirilib.

Şəhər birinciliyində İ.Qayıbov adına 1 nömrəli, Azərbaycanın Milli Qəhrəmanı M.Quliyev adına 3 nömrəli, 7, 9, 14, 16, 23, Şah İsmayıl Xətai adına 30 nömrəli, Y.Məmmədəliyev adına 31 nömrəli, 33 nömrəli, Təbiət Elmləri Təmayüllü Gimnaziyanın və M.Əsədov adına Orta Ümumtəhsil İnternat məktəbinin komandaları iştirak ediblər.

Yarışların baş hakiminin raportundan sonra Azərbaycan Respublikasının Dövlət Himni səsləndirilib.

Gənclər və İdman Baş İdarəsinin rəisi Musa Həsənov mütəmadi olaraq keçirilən “Cəsurlar” və “Şahin” hərbi-idman oyunlarının böyüməkdə olan nəslin vətənpərvərlik ruhunda tərbiyə edilməsində mühüm yer tutduğunu vurğulayıb.

Təhsil şöbəsinin müdir əvəzi Vaqif Ələkbərov  hərbi-idman oyunlarının yeniyetmə və gənclərin hərbi xidmətə qədər mənəvi və fiziki hazırlığında əhəmiyətli rolundan danışaraq məktəblilərə uğurlar arzulayıb.

Komandalar “Cəsurlar” Respublika hərbi-idman və turizm oyununun Əsasnaməsinə müvafiq olaraq sıra hazırlığı, taxta hasarın üstündən keçməklə maneənin dəf olunması, körpünün (taxtanın) üstündən keçməklə xəndəyin dəf olunması, kəndir vasitəsi ilə yüksəkliyə dırmanma və yüksəklikdən enmə, yerdə sürünməklə maneənin dəf olunması, “istehkamda” yerləşərək hədəfə qumbara atma, “zəhərli zona”nın dəf olunması, yaralının döyüş zonasından çıxarılması, turist çadırının qurulması mərhələləri üzrə yarışıblar.

Yarışların nəticələrinə əsasən Milli Qəhrəman M.Quliyev adına 3 saylı tam orta məktəbin komandası I, 33 saylı tam orta məktəbin komadası II yerə, 9 nömrəli tam orta məktəbin komandası isə III yerə layiq görülüb.

Komandalar Baş İdarənin və Təhsil Şöbəsinin fəxri fərmanları, hədiyyələri ilə təltif ediliblər.

Yarışda I yeri tutmuş komanda “Cəsurlar” Respublika hərbi-idman və turizm oyununun 03 mart 2014-cü il tarixində Quba rayonunda keçiriləcək zona birinciliyində şəhəri təmsil edəcək.