"Rəşad Sadıqovun qiyməti ilə razıyam, amma Özkaranın qiyməti çox bahadır" 

Futbolçuların transfer qiymətləri həmişə maraq kəsb edən mövzu olub. Bəs görəsən Azərbaycan yığmasının üzvlərinin transfer qiyməti necədir? Məşhur transfermarkt.de saytında bizim millinin oyunçularının da dəyəri göstərilib. Məhz həmin saytda göstərilən qiymətlərə əsasən, Azərbaycan yığmasının ən bahalı oyunçularını müəyyənləşdirdik. 

Maraqlıdır ki, millimizin formasını geyinən ən bahalı futbolçu Cihan Özkaradır. Daha çox sonradan meydançaya çıxması ilə diqqət çəkən türk əsilli hücumçunun transfer qiyməti 900 min avrodur. İkinci pillədə kapitan Rəşad Sadıqov qərarlaşıb ki, onun qiyməti 650 min avroya bərabərdir. Bu isə o deməkdir ki, ən bahalı azərbaycanlı futbolçu məhz Rəşaddır.

Lent.az millimizin ən bahalı futbolçuların "20-liy"i sizə təqdim edir:

1. Cihan Özkara               900 min avro

2-3. Rəşad Sadıqov          650 min avro

2-3. Dmitri Nazarov                   650 min avro

4-5. Kamran Ağayev         500 min avro

4-5. Rahid Əmirquliyev     500 min avro

6-10. Mahir Şükürov         400 min avro

6-10. Ruslan Abışov                   400 min avro

6-10. Rasim Ramaldanov  400 min avro

6-10. Elvin Məmmədov     400 min avro

6-10. Əfran İsmayılov       400 min avro

11-13. Səlahət Ağayev      350 min avro

11-13. Cavid İmamverdiyev        350 min avro

11-13. Nizami Hacıyev      350 min avro

14-17. Vaqif Cavadov       300 min avro

14-17. Vüqar Nadirov       300 min avro

14-17. Maksim Medvedev  300 min avro

14-17. Cavid Hüseynov     300 min avro

18. Araz Abdullayev                    250 min avro        

19-20. Rauf Əliyev            200 min avro

19-20. Ruslan Əmircanov  200 min avro

Bu qiymətlərin ədalətli olub-olmadığını dəqiqləşdirmək üçün 2 təcrübəli mütəxəssislə əlaqə saxladıq. Hazırda işsiz olan Ağasəlim Mircavadov və Şahin Diniyevin məsələyə maraqlı yanaşmaları oldu.

Ağasəlim Mircavadov:

"Həmin siyahıya diqqətlə baxmağım lazımdır. Sizin dediklərinizdən belə başa düşürəm ki, bəzi futbolçuların qiyməti artıq, bəzilərinin isə aşağı göstərilib. Millinin ən bahalı oyunçusu Cihandır? Qiyməti 900 min avrodur? Yox, əşi. Bu qiymət şişirdilib. Cihan millinin əsas oyunçularından deyil axı. 900 min avro aşağı məbləğ deyil, təxminən 1 milyon deməkdir. Millinin əsas heyət üzvü olmayan futbolçuya bu cür qiymət qoyulmaz. Rəşad Sadıqovun isə qiyməti ilə razıyam. Rəşad oynayandır və pis də təsir bağışlamır. Əksinə, əvvəlki illərlə müqayisədə indi daha ağıllı oyun sərgiləyir. Bu da onun təcrübəsinin artması ilə əlaqədardır. Mənim üçün maraqlıdır ki, görəsən, həmin alman saytı futbolçuların transfer qiymətini nəyə əsasən müəyyənləşdirir? Həm Rəşad, həm də Kamran Ağayev və Rahid Əmirquliyev dediyiniz Cihan Özkaradan öndə olmalıdırlar. Çünki onlar millinin aparıcı oyunçularıdırlar. Mahir Şükürovun transfer qiyməti 400 min avrodursa, bu, aşağı məbləğdir. Buna görə deyirəm ki, həmin siyahıda bəzi futbolçuların qiyməti dəyərindən çox, bəzilərinki isə az göstərilib".

Şahin Diniyev:

"Fərqli mövzuya toxunmusunuz. Hər hansı bir futbolçunun transfer qiymətini onun oyun keyfiyyətlərindən daha çox menecerinin razılaşması müəyyənləşdirir. Futbolçunun qiyməti bahadırsa, o demək deyil ki, transfer qiyməti ondan aşağı olan oyunçular zəifdirlər. Həmçinin transfer qiyməti onu göstərmir ki, həmin futbolçunu ancaq həmin qiymətə almaq və ya satmaq olar. Bu prosesi düşünüləndən çox aşağı və ya yuxarı qiymətə də həyata keçirmək olar. Sözümün canı odur ki, transfer qiymətləri reallıqdan çox uzaqdır, bunlar reytinq xətrinə olan şeylərdir. Futbolçuların müqavilələri bir-birindən fərqlənir, birində digərindən qat-qat aşağı şərtlər tətbiq olunur. Qısası, bunlar razılaşma əsasında baş tutur. Qaldı ki, bizim millinin üzvlərinin qiymətlərinə, dediyiniz saytın müəyyən etdiyi transfer qiymətlərində yanlışlıq çoxdur. Yəni şişirdilmiş qiymətlər az deyil. Mən ayrı-ayrılıqda hər futbolçu haqda fikir bildirmək istəmirəm. Amma Cihan Özkaraya qoyulan qiymətlə heç razı deyiləm. Buna görə deyirəm ki, şişirdilmiş qiymətlər çoxdur. Demək olmaz ki, Azərbaycanda transfer qiyməti çox olan futbolçu daha güclüdür. Əsla".