"Çox sevindirici haldır ki, milliyə yenidən dəvət aldım. Buna çox şadam. Baş məşqçiyə təşəkkür edirəm ki, mənə şans verdi. Məşqlərdə əlimdən gələni edirəm”.
Qol.az-ın məlumatına görə, bu sözləri milli komandamızın və "Sumqayıt”ın futbolçusu Cavid İmamverdiyev deyib.
Yığmamızın Antalyadakı toplanışında iştirak edən yarımmüdafiəçi Moldova ilə yoxlama oyununa ciddi hazırlaşdıqlarını bildirib: "Başqa nəsə deməyim düzgün çıxmaz. Matç barədə məşçimiz danışsa, yaxşı olar. Onu deyim ki, çox sevincliyəm. Start heyətdə oynayıb-oynamayacağımıza baş məşqçi qərar verir. Biz başımızı aşağı salıb futbolumuzu oynamalıyıq. Milli komanda və klub ayrıdı. Meydana çıxan hər bir futbolçu bacardığından artığını etməlidir”.
C. İmamverdiyev yığmaya dəvət alacağı ilə bağlı inamının 50-50-yə olduğunu deyib: "Çempionatda oynayan futbolçu millidən hər an dəvət gözləməlidir. Dəvət şansımı 50-50-yə düşünürdüm. Çox dəqiq bilmirdim. Şükürlər olsun ki, dəvət aldım”.
Milli komandamız Millətlər Liqasında Kosovo, Malta və Farer adaları ilə eyni qrupda mübarizə aparacaq. Uzun müddət sonra milliyə dəvət alan yarımmüdafiəçi qrup barədə danışıb: "Kağız üzərində favoritik. Amma zəif komanda anlayışı yoxdur. Qrupda zəif komanda yoxdur. İrəli getmək istəyiriksə, elə özümüzü ilk növbədə zəif bilməliyik”.

Xəbərdən istifadə edərkən istinad etmək vacibdir.