"Sumqayıt"ın futbolçusu Bəxtiyar Həsənalızadə evdə "Qarabağ"la 1:1 hesablı heç-heçə etdikləri Topaz Premyer Liqasının 18-ci tur matçından sonra jurnalistlərin suallarını cavablandırıb. 26 yaşlı müdafiəçi öncə oyunla bağlı fikirlərini bölüşüb:
- Oyun barədə nə deyə bilərsiniz?
- Ağır oyun oldu. Üstəlik, "Qarabağ” kimi komandaya qarşı çıxış etmək çətindir. Çalışdıq ki, müdafiədə diqqətli oynayaq. Əlimizə düşən fürsətləri qola çevirmək istədik. Bir qol vura bildik, amma yenə vurmaq olardı. Hər halda belə nəticə də bizim üçün qaneedicidir.
- "Qarabağ" daha çox hava ötürmələrinə üstünlük verirdi. Hiss olunurdu ki, "Sumqayıt” hava toplarına yaxşı hazırlaşmamışdı. Razısınız?
- Oyundan əvvəl baş məşqçimiz Samir Abasov "Qarabağ”ı analiz etmişdi. Bilirdik ki, rəqib, əsasən, cinahlardan və müdafiəçilərin arxasına ötürmələr edir. Bunun üzərində işləmişdik. Bir-iki epizodu çıxmaq şərti ilə normal oynadıq. Rəqibə çox şans vermədik. Elə epizodlar çox olmadı.
- Bu gün həm də bütün futbolçular eyni zamanda Azərbaycan millisinin baş məşqçisi olan Qurban Qurbanovun diqqətində idi. Moldova ilə ötən yoldaşlıq görüşü üçün milliyə çağırılmadığına görə prinsipiallığın var idi?
- Prinsipiallıq deməzdim. Amma hər bir futbolçu istəyir ki, özünü göstərsin. Biz də "Sumqayıt”ın uğuru və milliyə dəvət almaq üçün əlimizdən gəldiyi qədər çalışırıq. Nə dərəcədə aldındığına kənardan baxanlar qiymət verə bilərlər.
- Müdafiədə Rail Məlikovla oynamaq rahatdır, yoxsa Bəhlul Mustafazadə ilə?
- Mənim üçün fərqi yoxdur. Hər ikisi komandamızın üzvüdür. Seçim baş məşqçinindir. Hörmətlə yanaşmaq lazımdır. Gələn oyunlarda dəyişiklik baş verə bilər. Bizim işimiz futbol oynamaqdır.(Qol.az)

Xəbərdən istifadə edərkən istinad etmək vacibdir.