"Bakılı oğlanlar” Şən və Hazırcavablar Klubunun aparıcı üzvlərindən olan Bəhram Bağırzadə vaxtilə Müşahidə Şurasında üzvü olduğu "Neftçi”nin futbolçularını sərt şəkildə tənqid edib.
O, "Instagram”da qoşulduğu canlı yayımda "Bakcell Arena”da bu gün keçirilən "Neftçi” – "Qəbələ” oyunundan gəldiyini xatırladıb.
Bəhram Bağırzadə çəkilişə görə Azərbaycan Premyer Liqasının oyununu erkən tərk etdiyini bildirib. O qeyd edib ki, "Bakcell Arena”ya az sayda azarkeşlərin gəlməsinə səbəb "Neftçi” futbolçularının səriştəsizliyidir:
"Oyunda olarkən azarkeşlərin az gəlməsi barədə düşündüm. Oyuna bilet minimum 1, maksimum 5 manatdır. Ancaq stadionada cəmi 500 azarkeş vardı. Bizim konsertlər isə dörd gün dalbadal keçirilir və hər dəfəsində iki min tamaşaçı gəlir.
Halbuki bizdə konsertin qiyməti "Neftçi”nin oyunundakından yüksəkdir. Ən bahalı biletimiz 200 manatdır.
Azarkeşlərin stadiona az gəlməsinin səbəbi "Neftçi” futbolçularının öz var-yoxlarını meydanda qoymamalarıdır. Onların hamısı yox, 80 faizi öz anası, bacısı, şəhəri, komandası, ölkəsi üçün oynamır.
Əgər oynasaydılar, azarkeş də onların oyununa baxmağa gələrdi. Belə futbolçular gələcəkdə də ailəsinə, ölkəsinə faydalı insanlar olmayacaqlar”.
Qeyd edək ki, bu görüşdə "Neftçi” II pillədə olan "Qəbələ”ni 4-cü dəqiqədə kapitanı Ruslan Abışovun vurduğu qolla məğlub edib.(Oxu.az)

Xəbərdən istifadə edərkən istinad etmək vacibdir.