İri cüssəli olduğum üçün məni həmişə qapıçı qoyurdular
Xeberle.com olaraq
Sumqayıtın tanınmış simaları ilə müsahibələrə davam edirik. Budəfəki həmsöhbətimiz Azərbaycan paraolimpiyalı cüdoçu, ikiqat
Paralimpiya Oyunları və dünya çempionu, yeddiqat Avropa çempionu, Avropa
Oyunları qalibi İlham Zəkiyevdir.
Haşiyə:Zəkiyev İlham Əzizağa oğlu 3 mart 1980-ci ildə Sumqayıt şəhərində anadan olub.
1995-ci ildən Azərbaycanın əməkdar məşqçisi Əhməddin Rəcəblinin başçılığı
altında, Mehdi Hüseynzadə adına Sumqayıt şəhər stadionunda cüdo ilə məşğul
olmağa başlayıb. O, çox qısa bir müddət ərzində uğurlara imza atır, Sumqayıt şəhərində
keçirilən yarışmada qalib gəlir, gənclər arasında keçirilən cüdo üzrə Azərbaycan
birinciliyində qaliblər arasında yer tutub və sambo üzrə yeniyetmələr arasında
Respublika çempionu olub. 1997-ci ildə Sumqayıt şəhər 5 saylı tam orta məktəbi
bitirib, 1998-ci ilin iyun ayında Azərbaycan kubokunun qalibi olub. 1999-cu ildə cəbhə bölgəsində İlham Zəkiyev
snayperlə başından vuruluduqdan sonra görmə qabilliyətini itirib və bundan
sonra cüdo ilə ciddi məşğul olub.
İ.Zəkiyev Azərbaycan
paraolimpiyalı cüdoçu, ikiqat Paralimpiya Oyunları və dünya çempionu, yeddiqat
Avropa çempionu, Avropa Oyunları qalibi, Azərbaycanın Əməkdar İdman Ustası,
6-cı dan sahibi, Qarabağ müharibəsi əlili və qazisidir.
Azərbaycan prezidenti
İlham Əliyev tərəfindən Azərbaycan idmanındakı uğurlarına görə İlham Zəkiyev
2008-ci ildə "Şöhrət" ordeni ilə təltif edilib. 2009-cu ildə isə ona
Əməkdar İdman Ustası fəxri adı verilib.
- Sizi daha çox telekanallarda, tədbirlərdə görmüşük. Maraqlıdır, İlham Zəkiyev
necə ailə başçısıdır?
- Allah hamının övladını saxlasın, 3 övladım
var. Böyük oğlum İlkinin 12, qızım Aynurun 10 yaşı var. Son beşiyim olan Həmzənin
isə 5 yaşı var. Valideyn kimi övladlarımın
gələcəyinin parlaq olması üçün çalılşıram.
İstəyimiz onların dərslərində müvəfəqiyyət əldə etmələri, savadlı gənclər
olmalarıdır.
- On yaşınızda güləşlə məşğul olmağa
başlamısınız. O vaxt idman sahəsində hansı çətinliklər var idi?
- O vaxt idman sahəsində başdan-ayağa çətinlik
var idi. Məşq elədiyimiz zallarda nə istilik, nə də ki, havalandırma sistemi
mövcud deyildi. İnşaatçılar stadionuna məşq üçün piyada gedirdik. Şükürlər
olsun ki, hazırda idmana diqqət, qayğı yüksək səviyyədədir. Azərbaycanda elə
bir region yoxdur ki, orada beynəlxaq standartlara uyğun olimpiya kompleksi
olmasın.
- Müsahibələrinizin birində "Çempion
olmaq çətindirsə, o adı qorumaq ondan qat-qat çətindir" demisiniz. Bəs
çempion adını qorumaqla bağlı nə vaxtsa çətinliyiniz olubmu?
- 2004-cü ildə, ilk paralimpiya
oyunlarında İlham Zəkiyevi dünya üçüncüsü kimi o qədər də ciddiyə almırdılar.
Amma 2008-ci ildə məni paralimpiya, Avropa oyunları çempionu kimi tanıdılar. Mən
bu oyunlara ciddi olaraq hazırlaşmışdım və səylərimi artırmışdım. 2012-ci ildə
Londondan da şükrlər olsun ki, əliboş qayıtmadım və vətənə bürünc medal ilə
döndüm.
-
Erməni və başqa millətin nümayəndəsi ilə döyüşmək arasında hansı fərqlər var?
- Əlbəttə ki, hamısı rəqibdir. Amma
onlar çox zaman tatamidə rəqib olurlar. Oradan çıxandan sonra dostluq münasibətləri
qalır, təbii ki, ermənilərdən başqa. Onlar bizim bir nömrəli düşmənlərimizdir.
Ermənilər hələ ki, bizimlə güləşmək səviyyəsinə çatmayıblar. Paralimpiyada cüdo
üzrə yer tutsalar da, başqa idman növləri üzrə bir ədəd də olsun medalları
yoxdur.
-
2008, 2012 və 2016 Yay Paralimpiya Oyunlarında Azərbaycanın bayraqdarı
olmusunuz. Avropa oyunlarının məşəlini siz yandırmısınız. Belə bir möhtəşəm tədbirin
bağlanışını da sizə tapşırmışdılar. Necə bir hiss idi?
- Doğrudan da çox məsuliyyətli bir hiss
idi. Mənə demişdilər ki, saat 11-də qərargahda olmalısan, nə üçün çağırdıqlarını
bilmirdim. Getdim oraya və mənə bildirildi ki, nazir gələcək. Azad Rəhimov gəldi
və dedi ki, bir çox namizədlər içərisində cənab prezident və xanımı Mehriban
Əliyeva səni seçiblər. Stadionda məşəli sən yandıracaqsan. 3 ay əvvəlcədən gedərək
açılış mərasimi üçün məşq edirdik. Həqiqətən də mən bu məsuliyyəti öz üzərimdə
hiss edirdim. Onlar da yəqin ölçüb-biçərək qərar veriblər ki, İlham bu işin öhdəsindən
gələcək.
-
Futbol üzrə dünya çempionatında hansı ölkəyə azarkeşlik edirsiniz?
- Azərbaycan iştirak etmədiyi üçün heç
bir ölkəyə azarkeşlik etmək istəmirəm. Futbola uşaq vaxtından marağım olmayıb.
İri cüssəli olduğum üçün məni həmişə qapıçı qoyurdular (gülür). Nə hansısa komandanın
dəlicəsinə fanatı deyiləm, nə də ki, futbol izləmirəm.
- Azərbaycanın ən çox uğur qazanmış idmançılarından
birisiniz. Bu uğurun sirri nədir?
- İşimə sevərək yanaşıram və daim üzərimdə
çalışıram. Hər dəfə cənab prezident təltif edərək bizə stimul, motivasiya
verir. Biz də adımızı qorumaq üçün çalışırıq.
- Hazırda hansısa yarışa hazırlaşırsınızmı?
- Noyabrda dünya çempionatı olmalıdır. Bu
yarışa hazırlaşıram.
- Hər kəsin çatmaq üçün mübarizə apardığı bir
arzusu olur. Sizin reallaşdırmaq üçün çalışdığınız arzunuz varmı?
- Hər bir Azərbaycan oğlunun,
idmançısının olduğu kimi, mənim də yeganə arzum işğal altında olan
torpaqlarımızı azad edərək bayrağımızı orada dalğalandırmaqdır.
-
Bu sualı vermək artıq bizdə adət halını alıb. Sumqayıt sizin üçün hansı anlamı
ifadə edir?
- Sumqayıt mənim doğma şəhərimdir. Mən
burada dünyaya gəlmişəm, böyümüşəm, bağçaya, məktəbə getmişəm. Çox vaxt mənə
sual verirlər ki, nə əcəb Bakıya köçmürsən? Amma mənim buradan köçmək fikrim
yoxdur, çünki Sumqayıtı sevirəm.
Elnarə
Salamova
Xeberle.com
Xəbərdən istifadə edərkən istinad etmək vacibdir.
