Onun xüsusi təqdimata ehtiyacı yoxdur. "Kəpəz” futbol klubunu özü qədər sevən "Kəpəz” sevərlərin tribunadan «Adil dayı» kimi tanıdığı, "Xəmsə” fan klubunun yaradıcılarından biri, həyatını futbola həsr etməklə sadiq azarkeş obrazını tam mənasıyla yaradan Adil Məmmədovla sohbətləşdik. Həm futboldan, həm futzaldan, həm də hazırkı durumundan, səhhətindən, sosial vəziyyətindən danışdıq...

- Adil dayı, siz həm "Kəpəz”in, həm də yığma komandamızın sadiq azarkeşisiniz. Fikrinizcə, yığmamızın beynəlxalq yarışlarda uğursuzluqlarının səbəbi nədir?
- Biz yığma komandadan danışanda gərək həmişə yadımıza Premyer Liqa düşsün. Əgər Premyer Liqamızda səviyyəli komandalar varsa, deməli, milli komandamız da yaxsı olmalıdır. Premyer liqada 8 komanda var, 8 komandanın da 24 oyunçusu Milliyə dəvət alarsa, onlardan uğur gözləmək məncə çətindir. Çünki baş məşqçinin əlində futbolçu seçimi çox azdır. Milli üçün seçim etmək çətin olur. Mənim şəxsi fikrim budur. Bir də ki, milli komandanın səviyyəsini qaldırmaq üçün ilk növbədə ölkədə futbolun səviyyəsini qaldırmaq lazımdır. Saytların birində Elxan Məmmədovun açıqlamasını oxudum. Deyir ki, bizim Premyer Liqamiz səviyyəlidir ki, Qarabağ ÇL-nin qruplarına düşdü. Qarabağın və yaxud hər hansı bir komandanın ÇL və ya AL-in qruplarına düşməsinə heç bir etirazım yoxdur, çünki bu komandaların hamısı bizimdir. Ölkəmizi təmsil edirsə, deməli, biz hamısını dəstəkləməliyik. Ancaq başqa bir komandanın kölgəsində Premyer Liqanı yüksəltmək doğru deyil. Hal-hazırda Premyer Liqaya baxsaq kimlər var, "Qəbələ”, "Sumqayıt”. Qalan hamısı Bakı komandalarıdır. Onların da 80%-i mən bildiyimə görə, AFFA tərəfindən maliyyələşdirilir. AFFA tərəfindən maliyyələşdirilən komandalardan da, necə deyərlər, bundan artığını gözləmək olmaz. 

- Bir azarkeş olaraq, sizcə, Azərbaycan futbolunun yaranmış durumdan çıxış yolu nədir?
- Premyer Liqanın hal hazırdakı durumu Bakı çempionatına bənzəyir. Sumqayıt Bakıya yaxındır, 25-30 km məsafədə yerləşir. "Qəbələ” çox böyük infrastruktura malik bir komandadır, ancaq onlarda da çatışmazlıqlar çoxdur. Məsələn, kuboku götürə bilmədilər, "Keşlə”yə öz meydançalarında məğlub oldular. Yəni nəsə çatısmazlıqlar var. Bunları aradan qaldırmaq lazımdır.
Yəni deməyim odur ki, Azərbaycan futbolunun inkişafını istəyiriksə, Premyer Liqada komandaların sayını artırmaq lazımdır. 1-ci divizonda da say artırılmalıdır. Lazım gələrsə, 2-ci divizonu da yaratmaq olar. Region komandalarının yaradılması yaxşı olardı. Deməyim odur ki, ölkədə futbolçu sayı nə qədər çox olarsa, seçim şansı da çox olar. Məsələn, 12-14 komanda və hərəsinin 25 futbolçusu olarsa, bu zaman Milliyə də xeyirli olar. Öncə futbolu bölgələrə daşımaq lazımdır.

- Azərbaycan idman sahəsində beynəlxalq tədbirlərin keçirilməsinə hazırdırmı?
- Desəm ki, Azərbaycan beynəlxalq idman sahəsində yarışların ölkəmizdə keçirilməsinə hazır deyil, bu, gülünc olar, çünki ölkədə idman komplekslərinin tikilməsinə çox böyük maliyyə ayrılıb. Elə BOS-un tikilməsi, orada keçirilən yarışlar buna sübutdur.

- Bir az da "Xəmsə” fan klubundan, "Kəpəz”dən, bu kluba azarkeşlik etməyinizdən danışaq…
- Özünüz də çox yaxşı bilirsiniz ki, mən "Kəpəz” azarkeşiyəm və ölkə daxilində "Kəpəz”dən başqa heç bir klubun azarkeşi deyiləm. Mən öz klubuma sadiqəm. Bir azarkeş kimi "Kəpəz”dən, "Xəmsə” fan klubundan danışmaq mənim üçün həmişə xoşdur. Diqqətinizə çatdırım ki, "Xəmsə” fan klubunun yaradılması 2009-cu il iyun ayının 12-də mənim tərəfimdən təklif olunub və məndən əlavə dörd nəfərin iştirakı ilə yaradılıb. Biz beş nəfər "Kəpəz” azarkeşi bir araya gəlib fan klubunun adını "Xəmsə” qoyduq. "Kəpəz” Gəncənin olduğundan, Gəncə də Nizami yurdu olduğundan fan klubunun adı "Xəmsə” oldu. Ondan sonra iyun ayının 20-də məktubu hazırladıq, keçmis rəhbərliklə danışdıq və orada təqdimat olundu. Təqdimatda "Kəpəz” azarkeşlərini bir araya gətirdik və məktubu təqdim etdim. Orada rəhbərliklə tanış olduq, geniş söhbətimiz oldu. 
"Kəpəz” haqqında danışmaq çox ağırdı mənə və mənim kimi "Kəpəz” azarkeşlərinə. Klubun indiki durumu çox acınacaqlıdır. 2009-cu ildən bəri belə çətin vəziyyətə çox düşmüşük. "Kəpəz” indi layiq olmadığı yerdədir. Tarixi köklərə malik olan kluba belə yerlər yaraşmır. İnşallah, bu il qarşılarına məqsəd qoyub 1-ci diviziondan layiq olduqları yerə qayıdarlar.

- Sizin azarkeş kimi özünüzdə bəyəndiyiniz və ya bəyənmədiyiniz hansı xüsusiyyətlər var?
- Bəyəndiyim tək cəhət heç vaxt geri çəkilməmək, başladığım işi sona çatdırmaqdı. Bəyənmədiyim xüsusiyyətim isə yoxdur, çünki özümdən çox razıyam. İnsana qiyməti kənardan verərlər, nə deyim...

- Ölkəmizin futbol azarkeşlərinə, əsasən də gənc azarkeşlərə nə tövsiyə edərdiniz?
- Hər zaman kluba sadiq olsunlar, dəstək olsunlar. İstər qalib gələndə, istər məğlub olanda.

- Xarici klublardan və yığma komandalardan hansılara azarkeşlik edirsiniz?
- Ölkə xaricində heç bir kluba və ya milliyə azarkeşlik etmirəm. Almaniya və İspaniya futbolunu bəyənirəm.

- Bir az da futzal haqqında danışaq.
- "Xəmsə” yarananda sayımız çox az idi, həm də "Xəmsə”nin yaranması yay aylarına düşürdü deyə, mənim də ümidim yalnız tələbələrə idi. Həmin ərəfələrdə keçmis "İnter”, indiki "Keşlə”nin fan klubu fan klublar arasında futbol yarışı keçirdilər və biz orda bütün rəqibləri məğlub edib çempion olduq. Cempion olandan sonra bizim uşaqlar həvəsə düsdülər. Mən də AFFA-dan futzalla maraqlandım, elə maraqlananda şansımız gətirdi, bir komanda cempionatdan çəkilmişdi. Bizi ikinci dövrədən çempionata saldılar. Heç bir yerdən maliyyə dəstəyimiz olmadı, yalnız öz vəsaitim hesabına formalar, məşq etmək üçün yer təşkil etmişdim. Hətta elə vaxt olurdu ki, oyuna məşq etmədən çıxırdıq. Şəhər rəhbərliyinə, Gəncə şəhər İdman İdarəsinə, məktub yazmısdım, heç biri köməklik göstərmədi. Və 4 ildən sonra komandanı dağıtmağa məcbur oldum.
2010-cu ildə bizə iştirakçı klubların simpatiyasını qazanmış klub kimi kubok və diplom verdilər. Bunun da səbəbi o idi ki, çempionatın 1-ci dövrəsində 4 xalla sonuncu pillədə idik, amma sonra yeni oyunçular gətirdim və taktiki dəyişikliklər etdim. 2-ci dövrədə 44 xal yığaraq 14 komanda arasında 6-cı yeri tutduq. Ardıcıl 11 oyun qələbə qazandıq.

- Bildiyimə görə, səhhətinizdə ciddi problemlər var. Bu barədə danışardız, ümumiyyətlə, sosial vəziyyətiniz necədir?
- Doğru bilirsiz, hal-hazırda səhhətimdə ciddi problemler var. Bu problemlə təxminən 2 ilə yaxındır üzləşmişəm. Getdikcə ağırlaşdı və 2017-ci ilin aprel ayında çənə sümüyümdən əməliyyat olundum. Bundan sonra şüa terapiyadan istifadə etdim, çox ağrı keçirtdim. Xəstəliyim yenidən şiddətləndi və başladım kimya terapiyadan istifadə etməyə. Kimya terapiyanı başa vurduqdan sonra 2 ay keçməmis öyrəndim ki, xəstəlik yenidən baş qaldırıb. Analizlərin nəticəsində aydın oldu ki, həkim uğursuz əməliyyat keçirib, orada toxumları tam götürməyib. Yenidən əməliyyata məcbur oldum. Əvvəlki əməliyyatda çənə sümüyümü birləşdirməmişdilər, dəmir kimi bir şey qoydular. Həkimin dediyinə görə, o xəstəliyin əlaməti dilimdə də var idi və dilimdən də onu götürüb yenidən bərpa etdilər. Üstündən heç bir ay keçməmis bədənim o dəmiri qəbul etmədi, təkrar əməliyyat olundum. Hal-hazırda evdəyəm. İnşallah, yaxşılığa doğru gedəcək. Ümidim Allahadır. Allah verən ömrü heç kim ala bilməz. Hər kəsin öz alın yazısı var, nə vaxt yazılıbsa, o vaxt dünyamızı tərk edəcəyik. Sosial vəziyyət də çətindir. Bu əməliyyatlar çox ağır əməliyyatlar idi. Nəzərinizə çatdırım ki, bəzi azarkeşlər və klublardan mənə dəstək oldular. 

- Müsahibəyə görə təşəkkür edirəm. 

Sevinc NOVRUZOVA

P.S. Müsahibim yaxın günlərdə dördüncü dəfə əməliyyat olunacaq. Bu yazını yazmaqda məqsədim həm də sosial vəziyyəti yaxşı olmayan, qəlbi idmanla döyünən, futbolumuzun sadiq azarkeşinin əməliyyat və müalicə xərclərinin qarşılanması, sağlamlığına qovuşması üçün imkanlı azarkeşlərdən, klublardan, səxavətli insanlardan maddi dəstək olmalarını xahiş etməkdir. Azərbaycan xalqı hər zaman bu cür çağırışlara səs verərək, ehtiyacı olanlara yardım edib, dəstək durub. Acizanə şəkildə sizlərdən bu dəfə də Adil dayıya yardım etməyi, dayaq durmağı xahiş edirəm. Bu gün onun üçün 5 manat belə önəmli məbləğdir, əgər hər kəs ürəyinin səsini dinləyib bu insana ən azı 5 manat məbləğində maddi yardım etsə, əməliyyat və müalicə xərclərinin müəyyən məbləğini qarşılamış olarıq. Adil dayı kimi azarkeşlər var olduqca futbolumuz da inkişaf edəcək, azarkeşlərimiz də daim futboldan zövq alacaqlar. Biz də Adil dayıya Allahdan şəfa diləyirik, tezliklə səsinin tribunlardan eşidilməsini arzu edirik.

Adil dayını sağlamlığına qovuşdurmaq üçün qeyd olunan hesab nömrəsinə pul köçürə bilərsiniz:

Bank Respublika

Hesab nömrəsi manatla:

Adil Mammadov

İBAN: 3801944 01954993902

Şəxsiyyət vəsiqəsinin seriya nömrəsi: AZE 13516470 

‬MilliÖn və E manat-dan da göndərmək olur.

 

 

 

 

 

 

 

 

Xəbərdən istifadə edərkən istinad etmək vacibdir.