Xeberle.com xəbər verir ki, 1 saylı Uşaq Gənclər İdman-Şahmat məktəbinin fəaliyyət profili genişləndirilərək adı dəyişdirilib. Belə ki, Gənclər və İdman Nazirliyinin qərarı əsasında bundan sonra idman məktəbi "1 nömrəli İxtisaslaşdırılmış Olimpiya Ehtiyatları Uşaq-Gənclər-İdman-Şahmat Məktəbi" adlandırılacaq. İdman müəssisəsi Azərbaycan Respublikası Təhsil Nazirliyinin "Təhsil” Respublika İdman Mərkəzinin tabeliyində fəaliyyətini davam etdirəcək.

Qeyd edək ki, müstəqillik əldə edildikdən sonra 1 nömrəli İxtisaslaşdırılmış Olimpiya Ehtiyatları Uşaq-Gənclər İdman-Şahmat Məktəbi ilk belə idman müəssisəsidir. Xatırladaq ki, idman məktəbi 1967-cı ildən fəaliyyət göstərir və burada 14 idman növü üzrə idmançılar yetişdirilir. Müəssisənin direktoru 2004-cü ildə Yunanıstanın Afina şəhərində baş tutan XXVIII Yay Olimpiya Oyunlarının boks bürünc mükafatçısı, Sumqayıt şəhərinin ilk olimpiya mükafatçısı boksçu Fuad Aslanovdur. O, həmçinin 1987-ci ildə sözügedən məktəbdə boksla məşul olub və bu məktəbin yetirməsidir.