""Qarabağ” özünə və Azərbaycanın adına layiqli futbol oynadı. Məncə, hesab oyuna görə olmadı” .
Bu sözləri "Qarabağ”ın vitse-prezidenti Tahir Gözəl Avropa Liqasının qrup mərhələsinin 2-ci turunda "Arsenal”a 0-3 hesabı ilə uduzduqları oyundan sonra deyib.
Klub rəsmisi adlı-sanlı rəqibə qarşı layiqli oynadıqlarını bildirib:
"Qarabağ” layiqli və möhtəşəm oynadı. "Arsenal” və İngiltərə futbolunun azarkeşlərinin hörmətini qazandıq. Amma təəssüf ki, nəticə olmadı. Pressinq etdik, yaxşı oynadıq. Əsas da, ilk hissədəki oyunumuzu qeyd edərdim. "Qarabağ”ın adını dünyaya və Avropaya çatdırmaq məqsədimizdir. Bu yöndə davam edirik. Bu möhtəşəm stadionda dünyanın ən nəhəng klublarını qəbul edirik və bu, böyük uğurdur. Bu, bizim üçün xoş haldır. Bu oyun heç vaxt unudulmayacaq”.
Tahir Gözəl ""Qarabağ”ın növbəti mövsüm üçün büdcəsi artılacaqmı?” sualına belə cavab verib:
"Gəlirlərimizin böyük hissəsi bir sponsor tərəfindən əldə edilir. Demək olar ki, komandanın media gəlirləri yoxdur. Fanatlarımızın çoxu qaçqın və məcburi köçkünlərdir. Bilet gəlirlərimiz elə də çox deyil. Hədəfimiz bütün güclü komandalara qalib gəlmək deyil, eyni zamanda Qarabağ adını bütün dünyaya çatdırmaqdır. "Qarabağ” əldəki heyətlə möhtəşəm işlər görür. Bu komandaların heyəti yarım milyardlıqdır. Bizim büdcəmiz məhduddur. Bunlara heç vaxta çata bilmərik. Biz kiçik büdcə ilə uğurlar qazana bilərik. Yaxşı xatırlayıram, "İnter”lə Avropa Liqasında keçirdiyimiz oyunda hakim səhvlərini İtaliya mətbuatı da qabartmış və komandamıza haqsızlıq olunduğunu qeyd etmişdilər”.
(azxeber.com)
Xəbərdən istifadə edərkən istinad etmək vacibdir.
