Avropa Liqasında qrup mərhələsinin püşkatma mərasiminin vaxtı dəqiqləşib.
Avqustun 30-da baş tutacaq tədbir Bakı vaxtı ilə saat 15:00-da başlayacaq.
Monakoda təşkil olunacaq mərasimdə Avropanın ikinci dərəcəli klub turnirinin 48 iştirakçısı 12 qrupa bölünəcək. Azərbaycan çempionu "Qarabağ” da tədbirin potensial iştirakçıları sırasındadır.
Ağdam klubu ardıcıl 6-cı dəfə avrokubokların qrupunda yer almaq üçün Şimali İrlandiyanın "Linfild” klubunu keçməlidir. Səfərdə 2:3 hesabı ilə uduzan çempionumuz cavab oyununu avqustun 29-da Bakıda keçiriləcək.
Artıq qrup mərhələsinin 21 iştirakçısı bəllidir. Bunlar birbaşa bu raunddan yarışa qoşulacaq "Sevilya”, "Xetafe” (hər ikisi İspaniya), "Arsenal”, "Mançester Yunayted” (hər ikisi İngiltərə), "Roma”, "Latsio” (hər ikisi İtaliya), "Beşiktaş” (Türkiyə), MOİK (Rusiya), "Sportinq” (Portuqaliya), "Volfsburq”, "Borussiya” M (hər ikisi Almaniya), "Sent Etyen”, "Renn” (hər ikisi Fransa), "Standard” (Belçika), "Aleksndriya” (Ukrayna), "Volfsberq” (Avstriya) və "Luqano” (İsveçrə), həmçinin Çempionlar Liqasının Çempionlar yolunun III təsnifat mərhələsində uduzan "Bazel” (İsveçrə), "Dinamo” (Kiyev, Ukrayna), "Başakşəhər” (Türkiyə) və "Portu” (Portuqaliya) klublarıdır. Avropa Liqasında pley-offun 21 qalibi və Çempionlar Liqasında pley-offun 6 uğursuzu da qrupa düşəcək.
Qeyd edək ki, Çempionlar Liqasının püşkatması bir gün öncə keçiriləcək. Tədbir Bakı vaxtı ilə saat 20:00-da başlayacaq.
Xəbərdən istifadə edərkən istinad etmək vacibdir.
