Gənclər və İdman Baş İdarəsi tərəfindən təşkil edilmiş Sumqayıt şəhərinin 65 illik yubileyinə həsr olunan idman tədbirləri davam edir. 

Tədbirlər barədə İdarənin baş məsləhətçisi Mail Hümbətov "Zaman-Azərbaycan”a ətraflı məlumat verib: "9-10 oktyabrda M. Hüseynzadə adına şəhər stadionunda Sumqayıt şəhərinin 65 illik yubileyinə həsr olunmuş kişi və qadınlar arasında keçirilmiş şəhər çempionatında kişilər arasında Xanoğlan Zülfüqarov (60 kq), Murad Muradov (66 kq), Pərviz Şükürov (73 kq), Rövşən Səfərov (81 kq), Çingiz Ramazanov (90 kq), Sərxan Mərifəti (100 kq) və Musa Musayev (+100kq) bütün rəqiblərinə qalib gələrək fəxri kürsünün ən yüksək pilləsinə qalxıblar. Qadınlar arasında isə Sevinc Əliyeva (48kq) birinci olub”.

Eyni adlı tədbir 25 oktyabrda 1 saylı Uşaq Gənclər İdman Məktəbində 2003-cü il təvəllüdlü və daha kiçik yaşlı stolüstü tennisçilər arasında keçirilib. Gərgin idman mübarizəsi şəraitində davam edən yarışda Murad Koroğluyev oğlanlar, Karina Eyvazova isə qızlar arasında bütün rəqiblərini üstələyərək birinciliyin qalibi olublar. Yarışların qalib və mükafatçılarına Şəhər Gənclər və İdman Baş İdarəsinin fəxri fərmanı və hədiyyələri ilə təltif ediliblər.

Mail Hümbətovun verdiyi digər məlumatlara görə,  1-2 noyabr tarixlərində M. Hüseynzadə adına şəhər stadionunda Milli Dirçəliş Gününə həsr olunmuş yeniyetmə (1998-2000) oğlan və qızlar arasında keçirilmiş şəhər birinciliyində oğlanlar arasında Nicat Paşazadə (46 kq), Taleh Məmmədov (50 kq), Nicat İsmayılzadə (55 kq), İsmayıl İbrahimov (60 kq), Seymur Qocayev (66 kq), Hasil Cəfərov (73 kq), Akşin Məhəmmədzadə (81 kq), Nicat Aslanov (90 kq) və Ramil Babayev (+90kq) bütün rəqiblərinə qalib gələrək fəxri kürsünün ən yüksək pilləsinə qalxıblar. Qızlar arasında isə Sevda Vəliyeva (36kq), Şəhanə Hacıyeva (40kq), Əfsanə Rəsulova (44kq), Göyçək Əsədova (48kq), Gültac Məmmədəliyeva (52kq), Leyli Ağayeva (57kq) və Fidan Tanriverdiyeva (63kq) birinci olublar. Yarışların qalib və mükafatçıları Şəhər Gənclər və İdman Baş İdarəsinin fəxri fərmanı ilə təltif olunublar. Bundan başqa, cari ilin 22-27 oktyabr tarixlərində Qəbələ rayonunda "Vətənin müdafiəsinə hazıram” poliatlon çoxnövçülüyü üzrə ali, orta ixtisas və texniki peşə liseyləri arasında Azərbaycan çempionatı keçirilib. Altı gün gərgin idman mübarizəsi şəraitində davam edən yarışda Sumqayıt şəhərinin yığma komandası 965 xalla bütün rəqiblərini üstələyərək ölkə çempionu adına layiq görülüb. Şəxsi yarışlarda Elturan Kərimli (100 metr qaçış) və Şahmurad Abdullayev (turnikdə dartınma) birinci olublar.