Sumqayıt Olimpiya İdman Kompleksində ümummilli lider Heydər Əliyevin anım gününə həsr edilmiş cüdo üzrə VIII ənənəvi beynəlxalq turnirə yekun vurulub. Sumqayıt şəhər Gənclər və İdman Baş İdarəsinin təşkilatçılığı ilə iki gün davam edən turnirdə 2006-2008-ci il təvəllüdlü oğlan və qızlar yarışıb.
Xeberle.com xəbər verir ki, turnirdə ölkəmizin şəhər və rayon komandalarının, həmçinin Rusiya, Ukrayna, Moldova və Gürcüstan komandalarının 500-ə yaxın idmançısı qalib adı uğrunda mübarizə aparıb.
Sumqayıt Şəhər İcra Hakimiyyəti başçısının birinci müavini Teymur Səmədov, Azərbaycan Respublikasının Gənclər və İdman Nazirliyinin sektor müdiri Cəbrayıl Həsənov, Azərbaycan Cüdo Federasiyasının Hakimlər Kollegiyasının sədri Mətin Rəhimli yarış iştirakçılarını və qonaq komandaları salamlayaraq, ümummilli lider Heydər Əliyevin Azərbaycana rəhbərlik etdiyi bütün dövrlərdə kütləvi bədən tərbiyəsi və idmanın inkişafına xüsusi diqqət və qayğı göstərildiyini, bu sahənin dövlət siyasətinin prioritetlərindən birinə çevrildiyini qeyd ediblər.
Natiqlər Prezident İlham Əliyevin uğurlu idman siyasəti nəticəsində Azərbaycanın bütün bölgələrində Olimpiya İdman komplekslərinin tikilməsindən, idmançılarımızın beynəlxalq yarışlarda əldə etdiyi uğurlardan danışıblar.
İki gün gərgin idman mübarizəsi şəraitində davam edən turnirdə ümumkomanda hesabında Sumqayıt, Rusiya Federasiyasının "Ural” və Anapa şəhərləri müvafiq olaraq birinci, ikinci və üçüncü yerlərə layiq görülüblər.
Xəbərdən istifadə edərkən istinad etmək vacibdir.
