Bu gün ölkə başçısının sərəncamı ilə təltif edilmiş Tokio-2020 Yay Olimpiya və Paralimpiya oyunlarında nailiyyət əldə edən Azərbaycan idmançılarının və məşqçilərinin mükafatlandırılma mərasimi keçirilib.
Xeberle.com xəbər verir ki, sonra gənclər və idman naziri Fərid Qayıbov Azərbaycan Respublikasının Prezidenti İlham Əliyevin sərəncamları ilə təltif edilmiş idmançı və məşqçilərə müvafiq dövlət mükafatlarının medal və vəsiqələrini təqdim edib.
Mükafatlandırılanlar arasında Olimpiya medalçıları – karateçi İrina Zaretskaya, cüdoçu İrina Kindzerskaya, sərbəst güləşçi Hacı Əliyev, həmçinin atlet Nazim Babayev olub. Paralimpiya çempionu İlham Zəkiyev, sərbəst güləş millimizin baş məşqçisi Namiq Abdullayev, Milli Paralimpiya Komitəsinin baş katibi Kamal Məmmədov, həmçinin kişi paracüdo millimizin məşqçisi, Sumqayıt Olimpiya İdman Kompleksinin məşqçisi Azad Zahidov da mükafatlandırılanlar arasındadır.
Qeyd edək ki, Azad Zahidov Sumqayıt Olimpiya İdman Kompleksinin cüdo üzrə məşqçisi, Tokio-2020 Paralimpiya oyunlarının bürünc mükafatçısı Namiq Abbaslının məşqçisidir.
Xatırladaq ki, Azərbaycan Respublikası Prezidentinin 12 avqust 2021-ci il tarixli və 6 sentyabr 2021-ci il tarixli sərəncamları ilə Tokio Olimpiadasında qazandıqları uğurlara görə 7 nəfər "Vətənə xidmətə görə” ordeni, 2 nəfər "Əmək ordeni”, 7 nəfər "Tərəqqi” medalı, 5 nəfər "Azərbaycan Respublikası Prezidentinin fəxri diplomu” ilə təltif edilib. Bundan başqa, Paralimpiya Oyunlarındakı yüksək nəticələrə görə 4 nəfər "Şöhrət” ordeni, 14 nəfər "Vətənə xidmətə görə” ordeni, 3 nəfər "Əmək ordeni”, 3 nəfər "Azərbaycan Respublikası Prezidentinin fəxri diplomu”, 11 nəfər isə "Tərəqqi” medalı ilə təltif ediliblər.
Xəbərdən istifadə edərkən istinad etmək vacibdir.
