Siyəzən şəhər stadionunda AFFA-nın 30 illik yubileyi münasibətilə təşkil olunan futbol turnirinin qalibləri mükafatlandırılıb.
Turnirdə Sumqayıt, Abşeron, Siyəzən, Xaçmaz, Şabran və Qusarı təmsil edən,, ümumilikdə, 8 komanda medallar uğrunda mübarizə aparıb.
U-13 liqası komandaları arasında keçirilən turnirin final oyununda Sumqayıt və Siyəzən təmsilçiləri qarşılaşıblar. Sumqayıtlı yeniyetmələr rəqibinə 4-1 hesabı ilə qalib gələrək çempion adını qazanıb. Üçüncü yerin qalibi isə Xaçmaz komandası olub.
Turnirin mükafatlandırma mərasimində Şimal Regional Futbol Federasiyasının rəhbəri Abdulla Məmmədov qalibləri təbrik edib.
Bildirilib ki, 1992-ci ildən fəaliyyət göstərən Azərbaycan Futbol Federasiyaları Assosiasiyası Azərbaycan Premyer Liqası, Azərbaycan Kuboku, milli komandaların oyunları, ümumilikdə bütün futbolun dəstəklənməsi, inkişafı və populyarlaşdırılması ilə məşğul olur. AFFA 1994-cü ilin mayında UEFA-nın Vyanada keçirilən 22-ci konqresində UEFA-ya, 1994-cü ilin iyununda FİFA-nın Çikaqoda keçirilən 49-cu konqresində FİFA-ya üzv qəbul olunub.
Çıxışlardan sonra qalib komandalara AFFA tərəfindən medallar və diplomlar təqdim olunub. Çempion Sumqayıt komandası isə turnirin kuboku ilə mükafatlandırılıb. Turnirin ən yaxşı qapıçısı, oyunçusu və ən çox qol vuran oyunçusu da xüsusi diplomlarla təltif edilib. (Azərtac)
Xəbərdən istifadə edərkən istinad etmək vacibdir.
