"Sumqayıt" yay fasiləsində ilk legioner transferini gerçəkləşdirib.
Xeberle.com klubun rəsmi saytına istinadən xəbər verir ki, "gənclik şəhəri" təmsilçisi kabo-verdeli futbolçu Stiven Pereyranı heyətinə qatıb.
2022/2023 mövsümü üçün transfer çalışmalarını davam etdirən "Sumqayıt” FK növbəti oyunçunu heyətinə cəlb edib. Belə ki, son olaraq Cənubi Afrika Respublikasının "Maritzburq Yunayted” klubunda çıxış etmiş Kabo-Verde millisinin üzvü Steven Pereira ilə 2+1 illik müqavilə imzalanıb. 28 yaşlı müdafiəçi komandamızda "5” nömrəli formada çıxış edəcək.
Qeyd edək ki, Hollandiya futbolunun yetirməsi olan Steven Pereira adıçəkilən ölkədə "Zvolle”, "Maastrixt” kimi klublarda çıxış edib. Pereira karyerası boyunca bu klublarla yanaşı Bolqarıstanın "ÇSKA” (Sofiya), Portuqaliyanın "Santa Klara”, "Akademiko Viseu” və "Oliveyrense” klublarının da uğurları üçün çalışıb. O, Kabo-Verde millisinin heyətində 10 oyunda da iştirak edib.
Xəbərdən istifadə edərkən istinad etmək vacibdir.
