Vaxtı ilə "Xəzər Lənkəran", "Karvan" kimi klublarda köməkçi-məşqçi kimi çalışmış Zakir Mahmudovun işlətdiyi ticarət obyekti yanıb.
Mahmudovun Sumqayıtdakı obyekti, əslində, indi yox, xeyli əvvəl yanıb. Amma xəbər bizə məhz bu günlərdə çatdığından, məşqçiylə əlaqə saxlamaq qərarına gəldik.
Zakir bəy açıqlmasında məlumatın doğru olduğunu təsdiqlədi:
"Sumqayıtda mənim obyektimdə yox, ümumilikdə "Karvan" ticarət mərkəzində yanğın oldu. Orada kiçik bir obyekt işlədirdim. Yanğın zamanı ora da içindəki mallarla birgə yandı".
Mahmudovun hazırda nə işlə məşğul olduğu ilə də maraqlandıq. O, hazırda işsiz olduğunu dedi:
"Hazırda heç bir yerdə çalışmıram. Sonuncu dəfə "Sumqayıt"ın aşağı yaş qruplarından ibarət komandasında çalışmışam. Ordan ayrıldıqdan sonra 9 aydı işsizəm. Mənim indi elə yaşımdı ki, oyunçu yetişdirməliyəm. "Sumqayıt"dakı oyunçuların bir çoxu mənim yetirməm olub. Heç kimə gedib "mənə iş tapın" deyə bilmərəm. Hazırda işsiz olduğumu bilirlər. Bu yaşdan sonra gedib kateqoriya almaq üçün oxuya bilmərəm. Mənim 22 illik məşqçi təcrübəm var. Yetişdirdiyim oyunçular da göz qabağındadı. Hansısa klubun aşağı yaş qruplarında, məmnuniyyətlə, işləyərdim".
Zakir Mahmudov vaxtı ilə "Şəmkir", "Karvan" və "Xəzər Lənkəran" kimi komandalarda köməkçi-məşqçi kimi çalışıb. O, bu komandalarla dəfələrlə çempionatın müxtəlif meyarlı medallarını qazanıb. (komanda.az)
Xəbərdən istifadə edərkən istinad etmək vacibdir.
