Xəbər verdiyimiz kimi, Mehdi Hüseynzadə adına Sumqayıt şəhər stadionunda son tamamlanma işləri aparılır. Bugünlərdə stadionun qarşısına iki futbolçunun mübarizəsini əks etdirən 4 metr hündürlükdə kompozisiya quraşdırılıb.
Hər şeydən öncə bir şəhər sakini olaraq bizi də bir sual narahat etdi; niyə adını daşıdığı stadionun önündə Mehdi Hüseynzadə deyil, ixtiyarı iki futbolçu xatırlanıb?
Stadionunun direktoru Nadir Quliyev Xeberle.com-a açıqlama verərək bildirib ki, stadion futbolla əlaqəli olduğu üçün futbolçuların heykəli qoyulub, lakin Mehdi Hüseynzadənin də heykəli artıq hazırlanaraq gətirilib və stadionun əsas girişində olacaq. Direktor əlavə olaraq bildirib ki, son tamamlanma işləri görülür və stadionun açılışı üçün hazırlıqlar yekunlaşmaq üzrədir.
Məlumat üçün bildirək ki, yeni stadion 60 il əvvəl istifadəyə verilmiş Mehdi Hüseynzadə adına şəhər stadionunun yerində inşa edilib. Bu stadionun tikintisinə 2020-ci ildən başlanılıb və büdcədən bir neçə dəfə vəsait ayrılıb.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
