Son illərdə Sumqayıt şəhərinin sosial-iqtisadi inkişafı gənclər üçün də böyük imkanlar yaradır. Bu gün gənclərin qarşısında duran ən böyük çağırış ondan ibarətdir ki, əmək bazarına, bu gün iqtisadiyyatın tələb etdiyi bilik və bacarıqlara uyğun ixtisaslara yiyələnsinlər. Gənclərin işlə təminatı sahəsində dövlət və özəl sektor tərəfindən mühüm tədbirlər həyata keçirilir, lakin buna baxmayaraq, gənclər də öz növbəsində yeni iş yerlərinin yaradılması ilə bağlı təşəbbüslərlə çıxış etməlidir.
Sumqayıt şəhər İcra Hakimiyyətinin mediaya yaydığı məlumatda qeyd edilir ki, şəhərdə orta aylıq əməkhaqqı 14% artıb. Məlumata görə, bu ilin yanvar-sentyabtr aylarında Sumqayıt şəhərində orta aylıq əməkhaqqı 850 manat təşkil edib. Bu, ötən ilin eyni dövrü ilə müqayisədə 14,1 % çoxdur. Hesabat dövründə Sumqayıtda 1 121 yeni iş yeri açılıb. Daha sonra verilən məlumatda o da qeyd edilir ki, 9 ay ərzində şəhərdə ticarət dövriyyəsinin dəyəri isə 400 milyon manat təşkil edib ki, bu da 1 il əvvələ nisbətən 22,6 % çoxdur.
Görəsən, Sumqayıtda orta aylıq əmək haqqı hansı göstəricilərə əsasən müəyyən edilir?
Mövzu ilə bağlı iqtisadçı, millət vəkili Vüqar Bayramov Xəbərlə.com-a münasibət bildirib. Deputat açıqlamasında deyib ki, Sumqayıtdakı orta aylıq əmək haqqındakı artım faizi ölkə üzrə orta aylıq əmək haqqıdan daha yüksəkdir:
"Ümumiyyətlə, Azərbaycanda orta aylıq əmək haqqı təxminən 11,3 faiz artıb. Orta aylıq əmək haqqının artması həm dövlət, həm də özəl sektor hesabına baş verib. Sumqayıtdakı orta aylıq əmək haqqındakı artım faizi ölkə üzrə orta aylıq əmək haqqıdan daha yüksəkdir. 2023-cü ildə dövlət sektorunda minimum əmək haqqının artması, eləcə də bir sıra sektorlarda çalışanların maaşlarının artırılması ilə bağlı cənab Prezident tərəfindən sərəncamlar, eyni zamanda Nazirlər Kabineti tərəfindən qərarlar verilib. Bütün bunlar Sumqayıtda dövlət sektorunda çalışanların əmək haqlarının artmasına imkan yaradıb. Eyni zamanda, Sumqayıtda özəl sektorda çalışanların əmək haqlarında artımlar var. Bir tərəfdən Sumqayıtda məşğulluğun rəsmiləşdirilməsi ilə bağlı islahatlar dərinləşdi. Digər tərəfdən, Sumqayıtda özəl sektorda aparılan monitorinqlər göstərir ki, əmək haqqı artımı müşahidə edilir. Bu da orta aylıq əmək haqqına birbaşa təsir göstərir. Ona görə də Sumqayıtda orta aylıq əmək haqqının ölkə üzrə orta aylıq əmək haqqından daha yüksək olması həm dövlət sektoru, həm də özəl sektorda çalışan vətəndaşlarımızın maaşlarının artması ilə bağlıdır”.
Elşən Yəhyayev
Xəbərdən istifadə edərkən istinad etmək vacibdir.
