"Azərbaycanda qızıl bazarında durğunluq müşahidə edilir”. 
Bu barədə iqtisadçı-ekspert Vüqar Bayramov bildirib. Onun sözlərinə görə, tələbatın azalmasına səbəb Azərbaycanda qızılın yığım forması kimi istifadə olunmamasıdır:
"SSRİ dövründə qızıla yığım vasitəsi kimi baxırdılarsa, hal-hazırda qızıl ölkəmizdə yığım forması kimi istifadə olunmur. Eyni zamanda dünya bazarında müşahidə edilən qiymət azalmaları Azərbaycan bazarında qiymətlərin azalmasına gətirib çıxarmır. Azərbaycan bazarında dünya bazarı ilə müqayisədə daha zəif qiymət azalmaları baş verir. Bu tələbatın artmasına imkan vermir. Dünya bazarında qızılın qiymətinin düşməsi fonunda, Azərbaycan bazarında qızılın qiymətinin azalacağını proqnozlaşdırmırıq. Bu da onunla bağlıdır ki, bu gün satışda olan qızıllar daha əvvəl ölkəyə gətirilən qızıllardır. Durğunluq olduğu üçün əvvəlki müddətdə alınmış qızılları satmaq mümkün olmayıb”. 
Ekspert bildirib ki, alıcılıq qabiliyyəti aşağı düşdüyü üçün qızılın qiymətinin iyun ayından başlayaraq ucuzlaşacağını proqnozlaşdırırıq: "Belə ki, iyun ayının ikinci yarısında Ramazan ayının başlaması toy və şənliklərə ara verəcək. Bu da qızıla olan tələbatı azaldacaq. O baxımdan qızılın qiymətindəki azalmaları iyunun ikinci yarısından başlayaraq müşahidə olunacaq”. 
Qeyd edək ki, son günlər dünya fond birjalarında qızılın qiymətində kəskin azalmalar müşahidə olunur. (AzVision.az)