Ötən il Sumqayıtda ümumi məhsul və xidmətlərin həcmi 4 milyard 837 milyon 409,3 min manata çatıb ki, bu da 2023-cü illə müqayisədə 1,1 faiz artım deməkdir. Ümumi məhsul buraxılışında istehsal sahələrinin payı 84,3 faiz, xidmət sahələrinin payı isə 15,7 faiz təşkil edib.
AZƏRTAC xəbər verir ki, bu barədə Sumqayıt şəhərinin 2024-cü ildə sosial-iqtisadi göstəricilərinə dair məlumatda qeyd olunub.
Sənaye sektorunda da müsbət dinamika müşahidə olunub. Ötən il iri, orta, kiçik sahibkarlıq subyektləri, ev təsərrüfatları və fərdi sahibkarlar tərəfindən istehsal olunan mal və xidmətlərin həcmi əvvəlki illə müqayisədə 1,2 faiz artaraq, 3 milyard 775 milyon 504,5 min manata yüksəlib.
Şəhərin iqtisadi və sosial inkişafına yatırılan investisiyalar da artıb. 2024-cü ildə bütün maliyyə mənbələrindən əsas kapitala 339 milyon 160,2 min manat vəsait yönəldilib. Bunun 282 milyon 609,3 min manatı tikinti-quraşdırma işlərinə sərf olunub. Əsas kapitala yatırılan vəsaitlərin 58,2 faizi dövlət sektorunun, 41,8 faizi isə qeyri-dövlət sektorunun payına düşüb.
Pərakəndə ticarət dövriyyəsində də artım müşahidə edilib. Ötən il istehlakçılara 1 milyard 885 milyon 817,2 min manatlıq məhsul satılıb. Bunun 467 milyon 608,7 min manatı (24,8 faiz) ərzaq məhsulları, içkilər və tütün məmulatları, 1 milyard 418 milyon 208,5 min manatı (75,2 faiz) isə qeyri-ərzaq malları olub.

Xəbərdən istifadə edərkən istinad etmək vacibdir.