Yaxın günlərdə OPEK üzvü olan ölkələrin nümayəndələrinin görüşü keçiriləcək. Bunu Venesuela prezidenti Nikolas Maduro bildirib. Prezidentin sözlərinə görə, bu görüşdə neft hasilatçısı olan ölkələr hasilatı ən azı iyuna qədər dondurmaq məsələsini müzakirə edəcəklər.
AVN-in yaydığı xəbərə görə, bundan əvvəl hasilatçı ölkələrin hasilatı azaltmaq barədə qərarı neftin ucuzlaşmasının qarşısını alıb və müəyyən qədər bahalaşma hiss olunub. Maduronun fikrincə, hasilatın dondurulması dünya bazarında stabillyin əldə edilməsi üçün ilkin addımdır: "Bu, ilk növbədə Rusiya, Qətər, Venesuela, Səudiyyə Ərəbistanına lazımdır”.
Qeyd edək ki, yanvar ayında dünya bazarında neftin qiyməti 20 faizə qədər ucuzlaşıb. Görüşün dəqiq tarixi barədə məlumat verilməsə də, bəzi dairələr müzakirələrin martın 20-də aparılacağını bildirir. Bu xəbəri Nigeriyanın neft naziri Emmanuel Kaçivka da təsdiqləyib. Nazir görüşün Rusiyada baş tutacağını desə də, hələlik Rusiya tərəfi görüşlə bağlı dəqiq tarix bildirmir. Energetika Nazirliyi görüş tarixinin dəqiqləşdirilmədiyini vurğulayan açıqlama yayıb.
Cebhe.info