Digər enerji təsərrüfatlarında olduğu kimi, "Sumqayıt Yüksək Gərginlikli Elektrik Şəbəkəsi”ndə də (YGEŞ) texniki göstəricilərin daha da yaxşılaşdırılması, o cümlədən enerjitəchizatı müəssisəsinə göstərilən xidmətin keyfiyyətinin daha da yüksəldilməsi, texnoloji itkilərin müəyyən olunmuş həddə saxlanması məqsədilə balans mənsubiyyətinə aid olan elektrik verilişi xətlərində (EVX) və yarımstansiyalarda bir sıra mühüm işlər yerinə yetirilmiş və hazırda bu istiqamətdə konkret addımlar atılır.

Bu məqsədlə tərtib edilmiş təmir qrafikinə uyğun son üç ayda nəzərdə tutulmuş işlər əsasən yerinə yetirilib.

"Azərenerji” ASC-nin Elektrik Enerjisinin Ötürülməsi İdarəsindən Səhmdar Cəmiyyətin Mətbuat xidmətindən SalamNews-a daxil olan məlumatda bildirilir ki, 220 kV-lik "Sənaye Qovşağı” yarımstansiyasında 110 kV-lik I və II şin sistemində boşaldıcılar müasir tiplilər ilə və 1 və 2 saylı 200 MVA avtotransformatorun 110 kV tərəfindəki dayaq izolyatorları da yenisilə əvəz edilmişdir. Bütün bunlarla yanaşı 220 kV-lik qapalı paylayıcı quruluşda (QPQ), yardımçı təsərrüfat binalarında və yarımstansiyanın digər hissələrində də müxtəlif təyinatlı yenidənqurma və təmir işləri həyata keçirilmişdir. Hazırda bu istiqamətdə müəyyən işlər davam etdirilir.

Qeyd edək ki, hesabat dövründə 110 kV-lik "Görədil” yarımstansiyasında 6 kV-lik 2-ci bölmədə boşaldıcı və gərginlik tranformatoru yenisi ilə əvəz edilmişdir. Eyni zamanda 6 kV-lik "Nasos-Novxanı” və "Fatmayi-1” hava xətlərinin (HX) yağ açarları yeni vakuum açarla əvəz edilmişdir. Bütün bunlarla yanaşı analoji işlər 110 kV-lik "Masazır” və "Sulfanol” yarımstansiyalarında da həyata keçirilmişdir.

Bildirilir ki, 110 kV-lik "Sumqayıt-2” və "Sumqayıt-3”, "Ceyranbatan” yarımstansiyalarında da müxtəlif təyinatlı təmir işləri görülmüşdür.

Enerji obyektinin digər məlumataına istinadən qeyd edək ki, təmir işləri YGEŞ-in balans mənsubiyyətinə aid olan EVX-lərdən də yan keçməmişdir. Belə ki, sözügedən dövrdə 500 kV-lik 2-ci "Abşeron”, 330 kV-lik 1-ci və 8-ci "Abşeron”, 220 kV-lik "Yaşma”, 7-ci "Abşeron”, 110 kV-lik 2-ci və 3-cü "Sumqayıt”, 1-ci "Xırdalan” və digər bir neçə HX-lərdə bəzi dayaqların təmiri, izolyatorların, naqillərin və ildırımötürücü trosların dəyişdirilməsi və digər müxtəlif təyinatlı təmir işləri həyata keçirilmişdir.

Digər enerji obyektlərində olduğu kimi, burada da yanğın təhlükəsizliyi məsələsi daima diqqət mərkəzində saxlanılır. Belə ki, müəssisənin bütün struktur bölmələrində könüllü yanğın dəstələri yaradılmış və yanğına qarşı qəza məşqləri keçirilmişdir.

Yarımstansiyaların ərazisi və EVX-lərin dayaqlarının ətrafı qurumuş otlardan, trassası isə yaşıl kütlədən təmişlənmişdir. Bütün yağ tutumlu elektrik avadanlıqlarında yağın səviyyəsi yoxlanılmış və normal səviyyəyə gətirilmişdir. Eyni zamanda qəza yağ tutumlarına baxış keçirilmiş, qurunt sulardan təmizlənmişdir. Bütün bunlarla yanaşı digər qabaqlayıcı tədbirlər də görülmüşdür.

İcrası reallaşdırılan tədbirlər enerji ötürücülərində dayanıqlığın yüksək səviyyədə təmin edilməsinə geniş imkanlar açır.