Sumqayıt sakinlərini narahat edən və narazı olduqları sahələrdən biri də həmişə lift təsərrüfatı olub. İllərdi ki, bu sahədə böyük problemlər yaşanır. Bir çox hallarda liftlər işləmir, köhnəlib və nasaz vəziyyətdə olur. Son zamanlar bütün sahələrə, o cümlədən şəhərin infrastruktur obyektlərinə böyük diqqət göstərilməkdədir. Şəhərin lift təsərrüfatının yenidən qurulması ilə əlaqədar atılan addımlar da dediklərimiz sırasındadır. 
Sumqayıt şəhər "Lift-Servis” Birliyinin rəisi Cümşüd İsmiyevin verdiyi məlumata görə, artıq şəhərin 6, 9, 10, 13, 18 mikrorayonlarında 140 ədəd təzə və müasir tipli lift yeniləri ilə əvəz edilib. Eləcə də, 2, 6, 13, 18, 10, 17-ci mikrorayonlarında 60 ədəd yeni və müasir liftlərin quraşdırılması nəzərdə tutulub.
Artıq bu haqda müvafiq sənədləşmə və texniki hazırlıq işləri aparılıb. Cari ilin aprel ayında işə başlanacaq. C. İsmiyev bu istiqamətdə işlərin gələcəkdə də davam etdiriləcəyini bildirib. 
Xatırladaq ki, Prezident İlham Əliyevin 13 oktyabr 2015-ci ildə imzaladığı sərəncama əsasən, Sumqayıt şəhərində çoxmənzilli binaların lift təsərrüfatının maddi-texniki bazasının möhkəmləndirilməsi üçün Sumqayıt Şəhər İcra Hakimiyyətinə Azərbaycan Respublikasının 2015-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan 3,7 milyon (üç milyon yeddi yüz min) manat, o cümlədən 03 mart 2016-cı ildə isə prezidentin müvafiq sərəncamı ilə Sumqayıtda lift təsərrüfatının maddi-texniki bazasının möhkəmləndirilməsi üçün daha 2,5 milyon (iki milyon beş yüz min) manat ayrılıb.(sumqayitfakt.az)