Aprelin 29-da SOCAR-ın "Azərikimya” İstehsalat Birliyinin (İB) Etilen-polietilen zavodunun ərazisində birliyin struktur bölmələrində əmələ gələn məişət və sənaye çirkab sularının təmizlənməsi qurğusunun təməlqoyma mərasimi keçirilib.

Şirkətin ekologiya üzrə vitse-prezidenti Rəfiqə Hüseynzadənin iştirak etdiyi mərasimdə "Azərikimya”nın icraçı direktorunun əməyin mühafizəsi və ətraf mühitin qorunması üzrə müavini Vüqar Kərimov İB-nin müəssisələrində məişət və kimyəvi çirkab sularının idarə olunması ilə barədə məlumat verib. O, 1967-ci ildən fəaliyyət göstərən "Təmizləyici qurğular” sahəsinin istismar müddətinin başa çatdığını bildirib, müasir standartlara uyğun yeni qurğunun tikintisi üçün qərar verildiyini və müvafiq prosedurların keçirildiyini deyib.

Bildirilib ki, qurğunun layihələndirmə, təchizat, tikintiyə nəzarət və şef-montaj işlərinin satın alınması məqsədilə tender keçirilib, Türkiyənin "İdeal Atık ve Su Arıtma Sistemleri” şirkəti tenderin qalibi olub və bu şirkətlə "Azərikimya” İB arasında müqavilə imzalanıb.

Təməlqoyma mərasimində yeni qurğunun kimya sənayesi və ümumilikdə Sumqayıt şəhəri üçün mühüm əhəmiyyət kəsb etdiyi vurğulanıb. Qeyd edilib ki, mövcud sutəmizləmə qurğusu 22 hektar ərazini əhatə etdiyi halda, yeni qurğu cəmi bir hektar ərazidə inşa olunacaq. Layihə gücü 2500 kubmetr/gün olan qurğuda elektrik enerjisinə və əmək sərfinə qənaət etməklə sutka ərzində 520 kubmetr məişət, 1980 kubmetr kimyəvi çirkab sularının tam təmizlənməsi mümkün olacaq.

Mərasimində "Azərikimya” İB müəssisələrinin modernləşdirilməsi çərçivəsində həyata keçirilən digər layihələrə də toxunulub, kimya sənayesinə göstərilən diqqət və qayğıya görə Prezident İlham Əliyevə minnətdarlıq bildirilib.