Sumqayıt şəhər sakini Fizuli Cabbarov Xeberle.com-a müraciət edərək qarşılaşdığı bir hadisə ilə bağlı şikayətini bildirib. Onun sözlərinə görə:  "Accessbank”ın Sumqayıt filialından götürülmüş kreditin tam şəkildə ödənməsindən sonra, müştərinin borcunun olmaması barədə  arayış  tələb etdikdə ona bildiriblər ki, bunun üçün 20 azn məbləğində pul ödəməlidir. Sizcə bu nə dərcədə  düzgündür? Kredit verərkən illik 25-30% tələb edildiyi halda 5 qəpik dəyərində olan bir arayışı niyə bu qiymətə satılmalıdır? Bir nüansı da diqqətinizə çatdırım ki, hər ay terminalda ödəmə edərkən aparatdan verilən termal kağızda olan yazılar 4-5 aya oxunmaz hala gəlir. 1 ildən sonra sistemdə yaranmış problemə görə desələr ki, sizin bu qədər banka gecikdirilmiş borcunuz var. Sizcə ödəmə etdiyinizi kimə sübut edə biləcəksiniz?”
Şikayətlə bağlı "Accessbank”ın baş ofisi ilə əlaqə saxladıq. Bankın ictimaiyyətlə əlaqələr şöbəsinin məsul şəxsi Könül Babayeva öz açıqlamasında bizə bildirdi ki, bəli, bizim bankda həqiqətən borcun bitdiyinə dair arayışın qiyməti 20 manatdır. Amma bu barədə ödəniş təkcə bizdə deyil, digər banklarda da tələb olunur. Səbəb açıqlanmır, sadəcə deyə bilərik ki, bankların hamısında hər növ arayış üçün komissiya tələb olunur və bizim bankımızda müəyyən olunmuş məbləğ 20 manatdır. Digər məsələyə gəldikdə isə deyə bilərəm ki, terminalın təqdim etdiyi çek bütün banklar üçün eyni kağızdan hazırlanır. Əgər müştəri tam əmin olmaq istəyirsə o, kreditini kassaya yaxınlaşaraq ödəyə bilər. Kassadan təqdim olunan çek daha keyfiyyətlidir.
Məlumatı doğrulamaq üçün digər banklarla - "Kapital Bank”, "AGBank”, "Unibank”, "Bank of Baku” ilə  əlaqə saxladıq. Məlum oldu ki, həqiqətən də digər banklarda arayış üçün komissiya tələb olunur. Lakin Accessbankdan fərqli olaraq  məbləğ 10 manat təşkil edir.  Bəs görəsən bu barədə ekspertlər nə düşünürlər? Banklarda tələb olunan bu ödənişlər qanunidirmi?
İqtisadçı-ekspert Natiq Cəfərli bildirdi ki, banklarda arayış pulla verilə bilməz, bu mümkün deyil. Kredit bitdikdən sonra müştəriyə arayış dərhal təqdim olunmalıdır və bu arayış kreditin nə zaman götürüldüyü və nə zaman bağlandığı haqqında məlumatı özündə əks etdirməlidir. Bu xidmət pulsuzdur və bunun üçün heç bir rüsüm tələb olunmamalıdır. Bankların bu addımı qeyri-qanunidir.
 Hüquqşünas Əkrəm Həsənov da bu hərəkəti qanunsuz hesab etdiyini bildirdi və əlavə etdi ki, qanunda bu məlumatın verilməsi üçün haqq tələb olunması nəzərdə tutulmayıb. Belə ki, Mülki Məcəllənin 961.1-ci maddəsinə əsasən müştəri hesabındakı pul vəsaiti ilə əməliyyatların aparılması üzrə bank xidmətlərinin haqqını ödəyir. Yəni, bank, apardığı əməliyyata görə haqq tuta bilər. Ümumiyyətlə, istehlakçını məlumatlandırmaq hər bir sahibkarın, o cümlədən bankın vəzifəsidir.
Şikayətlə əlaqədar olaraq Azərbaycan Respublikası Maliyyə Bazarlarına Nəzarət Palatası ilə əlaqə saxladıq. Bizə bildirildi ki, arayış üçün xidmət haqqı müştəri ilə bağlanan müqavilədə qeyd olunur. Əgər xidmət haqqı qeyd olunmayıbsa bankların bu hərəkəti qanunsuzdur. Banklar xidmət haqqını müəyyən etməkdə sərbəstdirlər. Müştəri ilə bağlanan  müqavilədə arayış üçün xidmət haqqı barədə heç bir məlumat qeyd olunmayıbsa, lakin bankın rəsmi saytında müqavilə şərtlərində bu barədə maddə varsa, yenə də bankın tələb etdiyi məbləğ ödənilməlidir. Əgər sizin bununla bağlı probleminiz varsa bankdan çıxarış istəyin. ASAN xidmətə müraciət edərək 2 manat rüsum ödəməklə kreditin bitdiyinə dair arayış əldə edə bilərsiniz.
Sonda qeyd etmək istəyirik ki, əgər banklarda bu cür problemlə qarşılaşmaq istəmirsinizsə, kredit götürməzdən əvvəl bankın bütün şərtləri barəsində məlumat əldə etməyə çalışın. Əks təqdirdə, belə surprizlərlə qarşılaşmağınız qaçılmazdır.
Elnarə Salamova
Xeberle.com

Xəbərdən istifadə edərkən istinad etmək vacibdir.