Artıq üçüncü həftədir ki, «Azərikimya» İstehsalat Birliyi ARDNŞ-nin Təlim Tədris və Sertifikatlaşdırma İdarəsinin Sumqayıt Təlim Tədris Mərkəzində 2011-2012-ci tədris ilində müxtəlif peşələr - elektrik qaz qaynaqçısı, kompressor qurğusu maşinisti, aparatçı, elektrik avadanlıqlarının təmiri və xidməti üzrə elektrik montyoru, nəzarət-ölçü cihazları və avtomatika üzrə çilingər, tornaçı, təmirçi-çilingər peşələri üzrə təhsillərini uğurla başa vuraraq Birliyin müxtəlif idarə və müəssisələrində neftçilər ailəsinin bərabərhüquqlu üzvü kimi sərbəst əmək fəaliyyətlərinə başlamış 100 nəfər gəncin ictimaiyyətə daha yaxından tanıdılması və peşə seçməkdə çətinlik çəkən sumqayıtlı gənclərə dəstək göstərilməsi kampaniyasına start vermişdir.

Bu kampaniya çərçivəsində daha üç nəfər gəncin qısa tərcümeyi-halı ilə birgə tədris və iş təəssüratlarını oxuculara təqdim edirik.

8. Hüseynov Elşən Rəfael oğlu 29 dekabr 1986-cı ildə Sumqayıt şəhərinin Kimyaçılar qəsəbəsində anadan olub.

18 saylı orta məktəbi 2004-cü ildə bitirib. Bir müddət təmir-tikinti işlərində fəhlə kimi çalışıb.

2008-2009-cu illər ərzində hərbi xidmət borcunu yerinə yetirdikdən sonra yenidən bir sıra özəl müəssisələrdə çalışıb. Daimi iş tapmaq arzusu ilə bir sıra şirkət və müəssisələrə üz tutub.

O cümlədən «Azərikimya» İstehsalat Birliyinə. «Azərikimya»ya müraciətini Elşən özü belə xarakterizə edir:

- Müvəqqəti işlərdən cana doymuşdum. Bir gün orda, bir gün burda. İstəyirdim ki, mənim də daimi iş yerim olsun. Fikrimdə bir neçə yer müəyyənləşdirmişdim ki, onlardan biri də «Azərikimya» İstehsalat Birliyi idi. Ona görə də ərizə ilə müraciət etdim və Birliyin İcraçı direktorunun müavini Xalıq Mustafayevin qəbulunda oldum. Konkret peşəyə, ixtisasa sahib olmadığıma görə, burada işləməyin mümkünsüz olduğu bildirildi. Elə Təlim Tədris Mərkəzində təhsil almaq təklifi də Xalıq müəllim tərəfindən gəldi. Düzünə qalsa, belə bir mərkəzin mövcudluğundan xəbərim yox idi. Mərkəzlə tanışlıqdan sonra, tərəd-düd etmədən, müraciət forması doldurdum. Hər şey uğurlu alındı. Artıq xoş xatirələrlə dolu 10 aylıq təhsil müddəti arxada qalıb və mən 3 aydır ki, Etilen-polietilen zavodunun sintez sexində 4-cü dərəcəli dənəvərləşdirmə aparatçısı kimi işləyirəm. 500 manat zəhmət haqqı alıram. Deyərdim ki, bu, başlanğıc üçün çox gözəldir. 10 aylıq təhsili yüksək səviyyədə başa vursaq da hələ öyrəniləsi çox şeylər var. 35 ildir bu müəssisədə aparatçı işləyən Dilavər İsmayılovun məsləhətlərindən bəhrələnməyə çalışıram. Ali məktəbə hazırlaşdığımdan, boş vaxtlarımda çoxlu kitab oxuyur, internetdən istifadə edirəm. Bir çox proqramlar üzrə kompüter kurslarını bitirib, sertifikat almışam. Qürurverici haldır ki, «Azərikimya» İB-də keçirilən «Breyn-rinq» yarışlarının, demək olar ki, hamısında iştirak etmişəm. Və bu gün də öz üzərimdə ciddi çalışıram. Söhbət əsnasında Elşən onu da bildirdi ki, zəhmətkeş, əməksevər ailədə böyü¬dü-yündən, işin çətinliyi onu qorxutmur. Bir müddət «Azərikimya» İstehsalat Birliyində montaj işləri ilə məşğul olan atası hazırda özəl sektorda çalışır. Qardaşı 1 saylı peşə məktəbində təhsil alır. Onun fikrincə Sumqayıtdakı mövcud peşə məktəbləri ARDNŞ-nin Təlim Tədris və Sertifikatlaşdırma İdarəsinin Sumqayıt Təlim Tədris Mərkəzi ilə müqayisəedilməzdir və Azərbaycanda bu qəbildən olan Mərkəzlərin sayı çox azdır.

9. Ağayev Fərid Sadiq oğlu. 31 may 1991-ci ildə Sumqayıt şəhərində anadan olub.

17 saylı orta mək¬təbi 2010-cu ildə bitirib. Ali təhsil almaq istəyi ilə dərslərinə ciddi hazırlaşsa da, cüzi bal yetərsizliyi ilə öz istəyinə qovuşa bilməyib. Beləcə, hərbi xidmətə çağırılıb və 2010-2011-ci illər arası Vətənə xidmət borcunu yerinə yetirib.

Bir çox kompüter proqramlarını mükəmməl bildiyindən, bir müddət reklam işləri ilə məşğul olub. Müxtəlif idarə və müəssisələr üçün reklam blokları hazırlayıb. Sumqayıt Təlim Tədris Mərkəzi haqqındakı məlumatı da elə internet səhifələrindən alıb.

Dünyanın ən aparıcı şirkətlərindən olan Azərbaycan Respublikası Dövlət Neft Şirkətinin struktur bölmələrində işləmək marağı onu Sumqayıt Təlim Tədris Mərkəzinə gətirib çıxarıb. 10 aylıq tədris və istehsalat təcrübəsindən sonra təmirçi-çilingər ixtisasına yiyələnib.

Hazırda Etilen-polietilen zavodunun mexaniki və texnoloji avadanlıqların təmiri sexing¬də 4-cü dərəcəli təmirçi-çilingər kimi fəaliyyət göstərir. Fəridlə söhbət zamanı o da məlum oldu ki, iş yerində əmək şəraitindən, onlara göstərilən diqqət və qayğıdan razıdır. Əmək haqqı o qədər yüksək deyilsə də (350-360 manat), gələcəkdə dərəcəsinin artması hesabına bunun da yoluna düşəcəyinə inanır.

Fərid Ağayev işə qəbul zamanı xüsusi geyim və fərdi mühafizə vasitələri ilə təmin olunduqlarını, həmçinin əməyin mühafizəsi və təhlükəsizlik texnikası ilə bağlı yetərli təlimatlar aldıqlarını vurğuladı. Tibbi sığorta ilə təmin olunmalarını isə bütövlükdə Dövlət Neft Şirkətində insan amilinə xüsusi önəm verilməsinin təzahürü olduğunu bildirdi. Asudə vaxtlarını təkcə kompüter arxasında keçirmədiyini deyən Fərid futbolla da ciddi məşğul olduğunu bildirdi.

Hətta imkan tapanda doğma «Sumqayıt» komandasının yarışlarını izlədiyini də dilə gətirdi və fikirlərini yekunu olaraq bir təşəkkür də ünvanladı: - Fürsətdən istifadə edib, futbolu sevən bir gənc kimi şəhərin demək olar ki, hər bir mikrorayonunda mini futbol meydançaları inşa etməklə Sumqayıt futbol ənənələrinin daha da inkişaf etdirilməsinə, həmçinin gənc futbolculara göstərilən xüsusi qayğıya görə şəhər rəhbərliyinə və «Azərikimya» İB-nin kollektivinə minnətdarlığımı bildirirəm.

10. Mirzəyev Elnur Seyran oğlu 25 yanvar 1993-cü ildə Sumqayıt şəhərində anadan olub.

Orta təhsilini şəhərdəki 15 saylı orta məktəbdə alıb. 2011-ci ilin yanvarından 2012-ci ilin iyuluna kimi hərbi xid-mətdə olub. Hərbi xidmətdən qayıdan kimi də dostlarının təklifi ilə sənədlərini ARDNŞ-nin Təlim, Tədris və Sertifikatlaşdırma İdarəsinin Sumqayıt Təlim Tədris Mərkəzinə təqdim edib. Test imtahanlarını müvəffəqiyyətlə verəndən sonra məktəbin şagirdi adını qazanır, 10 aylıq təlim və tədrisdın sonra aparatçı ixtisasına yiyələnir. - Əslində, ali təhsil alaraq Neft Şirkətinin hər hansı bir müəssisəsində işləməyi orta məktəb illərindən arzulayırdım.

Amma iş elə gətirdi ki, məzun olduğum il ali məktəbə qə-bul ola bilmədim. Sonra da hərbi xidmət borcunu yerinə yetirməyə yollandım. Təbii ki, bu, mənim qəlbimdə gəzdirdiyim istəyin üstünə kölgə sala bilmədi. Sadəcə olaraq, fikrimdə dönüş yaratdı və mən ali təhsil ardınca istehsalatda bərkiyəndən sonra getməyi qərarlaşdırdım.

Sumqayıt Təlim-Tədris Mərkəzində təhsil almağıma peşman deyiləm. Çünki burada təhsil almaqla, aparatçı kimi həmişə ehtiyac duyulan bir peşəyə yiyələndim və arzusunda olduğum Neft Şirkətinin «Azərikimya» İstehsalat Birliyinin Etilen-polietilen zavodunun Sintez sexində əmək fəaliyyətinə baş¬ladım. Gələcəkdə ali təhsil almaqla, qəlbimdə yurd salmış arzuları gerçəkləşdirmək və Azərbaycan neft sənayesi üçün gərəkli bir mütəxəssis olmaq niyyətindəyəm.

Rafiq Oday