"Hidrogen qazının yanacaq elementlərinə verilməsi və elektrik enerjisi əldə edilməsinə imkan verəcək”

Azərbaycan Milli Elmlər Akademiyasının (AMEA) Radiasiya Problemləri İnstitutunda hidrogen qazının alınması istiqamətində tədqiqatlar aparılır. Akademiyanın İctimaiyyətlə əlaqələr şöbəsindən ANS PRESS-ə verilən məlumata görə, institutunda radiasiya, fotokimyəvi üsulla su və karbohidrogen sistemlərində molekulyar hidrogenin alınması istiqamətində elmi-tədqiqat işləri aparılır. Hazırda bu kimi tədqiqat işləri bir neçə laboratoriyada, o cümlədən “Enerjitutumlu radiasiya prosesləri” laboratoriyasında həyata keçirilir. 

Laboratoriya müdiri, Hökmən Mahmudov bildirib ki, tədqiqatlar atom-hidrogen energetikası sahəsini əhatə edir: “Məqsəd, ənənəvi enerji resurslarının azaldığı və alternativ enerji mənbələrinə artan təlabata uyğun olaraq “gələcəyin enerjisi” adlandırılan hidrogen energetikasını inkişaf etdirməkdir”.

O, qeyd edib ki, Hidrogen energetikasının digər sahələrdən üstünlüyü, yanma zamanı ətraf mühitə zərərli tullantılar buraxılmamasıdır: “Son dövrün araşdırmaları göstərir ki, yanacaq elementləri (fuel cell) texnologiyalarının inkişafı alınan hidrogen qazının yanacaq elementlərinə verilməsi və elektrik enerjisi əldə edilməsinə imkan verəcək”
Qeyd edək ki, Yaponiya, Amerika, İngiltərə, Koreya və digər ölkələrdə də bu sahədə tədqiqatlar aparılır, alınmış nəticələr müxtəlif nəşriyyatlarda dərc olunur.