Paytaxtda mənzillərin qiyməti durmadan artır. Eyni zamanda, ölkədə urbanizasiya prosesinin güclənməsi nəticəsində Bakıda evlərə tələbatın artması da mənzillərin qiymətinə birbaşa təsir edən faktordur. Məsələ ilə bağlı Hafta.az-a açıqlama verən iqtisadi və Sosial İnkişaf Mərkəzinin İdarə Heyətinin sədri iqtisadçı ekspert Vüqar Bayramov bildirir ki, mənzillərin qiymət artımı 2014-cü ildə də davam edəcək:

“Ümumiyyətlə, 2013-cü ildən etibarən ölkədə evlərin qiymətində təxminən 12 faiz artım müşahidə olunub. Bu artımların səbəbi həm mənzillərə olan tələbatlar, həm də Bakıda söküntü işlərinin aparılması nəticəsində insanlara nağd şəkildə konpensasiyaların verilməsidir. 2014-cü ildə təkcə “Sovetski” adlanan ərazidə 10 mindən çox insanın evi söküləcək. Bu da bazara 10 min insanın daxil olması deməkdir. Təbii ki, bu kimi tələbatlar nəticəsində mənzillərin qiymətində yenidən artım müşahidə olunacaq”.

İqtisadçı ekspert hesab edir ki, mənzillərin qiymət artımı ilin sonunda nəzərəçarpacaq dərəcədə yüksələcək:

“Bütün bunlar təsadüfi deyil ki, yanvar ayının yekunlarına görə Bakıda mənzillərin qiymətində 2.5 faiz artım müşahidə olundu. Aylıq artım olaraq bu çox yüksək rəqəm kimi qiymətləndirilməlidir. Çünki bu gedişlə illik artımın hətta 20 faizə qədər yüksəlməsi gözlənilir. Eyni zamanda, qiymət artımına bir sıra psixoloji məqamlar da təsir edir. Belə ki, hazırda söküntü işləri sürətlə getdiyi üçün insanlar düşünür ki, evlərin qiyməti qəfildən bahalaşa bilər. Buna görə də bazarlara axın edirlər. Bu da artıma təsir edən amildir. Eyni zamanda, süni şəkildə qiymət artımları da mövcuddur. Satıcılar söküntü ilə əlaqədar insanlara dövlət tərəfindən verilən konpensasiyadan istifadə edərək, evlərin qiymətini düşünülmüş şəkildə artırırlar. Bizim proqnozlarımıza görə mənzillərin qiymətində artım davam edəcək və 2014-cü ildə bu artım ən azı 10 faizə qədər yüksələcək”.