Belarusun Azərbaycandakı səfirliyi diplomatlarının Sumqayıtdakı Texnologiya Parkının rəhbərliyi ilə görüşü olub.

Səfirlikdən AzərTAc-a bildiriblər ki,  görüşdə Belarusda istehsal olunan avtomobil texnikası üçün detalların və komplektləşdiricilərin birgə kooperasiya istehsalının yaradılması üzrə əməkdaşlığın perspektivləri müzakirə edilib. Həmçinin Belarusun və Azərbaycanın dəmiryolu nəqliyyatı üçün yük vaqonları istehsalçıları arasında əlaqələrin qurulması məsələlərinə baxılıb.

Görüşdə Belarus və Azərbaycan mütəxəssislərinin informasiya-kommunikasiya texnologiyaları sahəsində əməkdaşlığının mümkünlüyü ilə əlaqədar fikir mübadiləsi də aparılıb.

Belaruslu diplomatlar texnoparkın ərazisindəki ağır maşınqayırma zavodunda və kommunikasiya sistemlərinin yaradılması üzrə laboratoriyada olublar.