Qida istehsalı zamanı məhsulun bir sıra keyfiyyət xüsusiyyətlərini artırmaq üçün təbii və ya sintetik yolla əldə edilmiş qida əlavələrindən istifadə edilir.
Bu barədə Axar.az-a Qida Təhlükəsizliyi Agentliyindən bildirilib.
"Hər bir məhsulun üzərində qida əlavələrini və onların miqdarını bildirən xüsusi göstəricilər olmalıdır. Hazırda qida istehsalı sənayesində təxminən 2500-ə yaxın qida əlavəsindən istifadə edilir. Qida əlavəsi istifadə edilərkən insan sağlamlığı üçün tam təhlükəsiz, zəhərsiz olması, xərçəng yaratmaması nəzərə alınmalıdır.
Bu əlavələrə aromatizatorlar, boyayıcı maddələr, qidanı uzun müddət saxlamaq üçün konservantlar, dadlandırıcılar, antioksidantlar və s. aiddir.
Avropada qida məhsulunun istehsalı zamanı qida əlavəsi istifadə edilibsə, onun kodu mütləq məhsulun nişanlanmış üz qabığında qeyd edilir. Məsələn, E260 kodunda "E” məhsulun Avropada istehsal edildiyini, 260 isə tərkibində sirkə turşusunun olduğunu bildirir. Qida əlavəsinə verilən bu cür kodlar onların öncədən laboratoriyada insan sağlamlığına ziyanlı olub-olmaması tədqiq edildikdən sonra verilir. Qida əlavələrindən limitdən artıq istifadə etmək insan sağlamlığı üçün təhlükəlidir”, - agentliyin məlumatında qeyd edilib.

Xəbərdən istifadə edərkən istinad etmək vacibdir.