Sumqayıt Sənaye Parkı (STP) əhalidən maliyyə vəsaitlərinin qəbul edilməsində istifadə edilən ödəniş terminallarının istehsalına başlayıb. Məlumata görə, ödəniş terminalları STP-nin Yüksək gərginlikli elektrik avadanlıqları zavodunun tərkibində yaradılmış terminal istehsalı sahəsində istehsal edilir. Parkın mühəndisi Elvin Aslanov istehsalla bağlı terminalın daxili qurğularının xaricdən alındığını bildirib: "Zavodda alınan qurğular yerli istehsal olan metal gövdənin içərisinə yığılır. Aparatın pulu qəbul edən, çek verən, pul sayan qurğuları, sensor və kompüter sistemi ABŞ və Rusiyadan alınaraq yığılır”. İndiyə qədər bu terminallardan artıq 200-dən çox istehsal edilib.Qeyd edək ki, ödəniş terminalları müxtəlif xidmətlərə görə əhalidən maliyyə vəsaitlərinin qəbul edilməsi və onlara xidmətlərin göstərilməsi üçün nəzərdə tutulan özünəxidmət məntəqələridir. Bu terminallar əhaliyə onlayn rejimdə 24 saat ərzində fasiləsiz xidmət göstərməyə imkan verir.(sia.az)