"AzerFloat” Qapalı Səhmdar Cəmiyyətinə Sumqayıt Kimya Sənaye Parkının (SKSP) rezidenti statusu verilib. Bununla da, qeyri-neft sektorunun ən iri layihələrindən olan SKSP-nin rezidentlərinin sayı 3-ə çatıb.
Bu barədə İqtisadiyyat və Sənaye Nazirliyinin mətbuat xidmətinin rəhbəri Abbas Əliyev AzərTAc-a müsahibəsində deyib.
"Sumqayıt Kimya Sənaye Parkının fəaliyyətinin təşkili və sənaye parkına investorların cəlb olunması istiqamətində tədbirlər davam etdirilir. Sənaye parkının inkişaf strategiyasına uyğun olaraq, sənayeləşmənin genişləndirilməsi istiqamətində yeni sənaye sahələrinin yaradılması, rəqabətqabiliyyətli, idxalı əvəz edən və ixracyönümlü yeni məhsul növlərinin istehsalının təşkili, yaradılan müəssisələrin ən müasir avadanlıqlarla və innovativ texnologiyalarla təchiz edilməsi, sənaye sahəsində məşğulluğun təmin olunması, sənaye parkının təşviq edilməsi və investorların cəlb olunması ilə əlaqədar işlər görülür” – deyə o vurğulayıb.
A.Əliyev bildirib ki, yeni rezident "AzerFloat” QSC sənaye parkının ərazisində Float texnologiyası (isti vannada yayma) əsasında şüşə lövhələrin istehsalı ilə məşğul olacaq. Layihə çərçivəsində 150 nəfərin çalışacağı və ildə 8 milyon kvadrat metr müxtəlif çeşiddə şüşə lövhələr istehsal edəcək Vərəqə şüşə zavodunun inşası nəzərdə tutulur. Burada istehsal olunacaq məhsulların daxili bazarın tələbatını ödəməklə yanaşı, xarici ölkələrə ixracı da planlaşdırılır. Hazırda ölkədə vərəqə şüşələrə olan tələbat əsasən idxal məhsulları hesabına təmin edilir.
Yeni yaradılan müəssisənin layihələndirilməsindən danışan A.Əliyev qeyd edib ki, zavod müasir avadanlıqlarla və qabaqcıl texnologiyalarla dünyada şüşə əritmə texnologiyaları sahəsində 125 illik təcrübəyə malik olan Almaniyanın "HORN Glass Industries AG” şirkəti tərəfindən təmin olunacaqdır.